الأربعاء، 11 فبراير 2009

لأنك معى


لأنك معى
لأنك متواجد داخل أنسجتى
تحتل شراينى

منتشر فى أجزائى
تتمدد فى كيانى

لأنك تحيا فى قلبى
وتأسر عالم أحلامى

لأنك أنت رسول الحب
ونبض القلب
وعشق العمر

لأنك لا تغيب رغم المسافات
ولا تهون رغم الصعوبات
ولا تنسى أجمل الذكريات
لأنك معى فى كل اللحظات

فلقد توجتك ملكاً على عرش المحبين
ولقبتك بأمير العشاق

هناك 72 تعليقًا:

مواطن مصرى نايم يقول...

جمييييييييييييييييييييييييييييييلة جداااااااااااااااا و الله
تحفة
و ربنا يديم عليكوا السعادة يا رب
و الله عجبنى جداااااا البوست
ــــــــــــ
فلقد توجتك ملكاً على عرش المحبين
ولقبتك بأمير العشاق
ــــــــــــ
الخاتمة تحفة بجد

بوست رائع

تحياتى

سلسبيل يقول...

لانك معي
انسي دوما استقلالية كياني
لاننا نتفاعل لنصير شخصا واحدا
لانك معي
يبدو الخوف طفلا غبيا مضحكا
كيف اخاف ويديك تحتضن احلامي وافكاري
وتربت فوق ايامي بهذا الحنان يغمرني فقط بمجرد سماع صوتك
لانك معي
اتوقف عن سرد الكلمات
فاي كلمات تستطيع وصف احساسي عندما نكون سويا؟؟
اي احرف تمتلك الشجاعة كي تقول لك كم احببتك
وكم احبك
وسأحبك بكل ما امتلك من عقل وجنون ونبضات
------------
خاطرتك جميله جدا
بساطتها واحساسها
وتصويرها رائع
دمتي بكل الخير :)

Kiara يقول...

لأنك لا تغيب رغم المسافات
ولا تهون رغم الصعوبات
ولا تنسى أجمل الذكريات
لأنك معى فى كل اللحظات

الله ربنا يديم الحب ياااارب

romansy يقول...

من يستحق حبك
يصبح ملكا
على قلوب امحبيبن

يعيش سعيدا

marmar يقول...

حبيبتي الرومانسيه الجامده ام ميرو السكره ازيك يا رومانسي انت يا شديد؟
ايه يا عم الحلاوة دي كلها
احنا مش اد الكلام الحلو ده
خفي علينا من رومانسيتك وكلامك شوية
ههههههههههههههههه
جميلة جدا جدا يا رورو الخاطرة
كالعاده متألقه دايما
وحشتيني

يا مراكبي يقول...

عندما كان بعيدا .. كان البعد مصدرا للإلهام .. فكانت القصائد السابقة كلها تدور حول ذلك

وعندما أصبح قريبا .. لم يأفل ذاك الإلهام

إذا إنه ليس البعد أو القرب

إنه شيء آخر أكبر وأعمق

ذو الوجه المبتسم يقول...

السلام عليكم
ممكن اعلق على كلامك ....
بذمتك انا متواجد داخل انسجتك واحتل شرايينك
هو انا اعرفك
ولا شفتك
ياااااه واحي بقلبك كمان
ايه ده كله .. رسول الحب
انتى تعرفينى .. ليه كده
---
اسمحى لى ان اقدم لك ابتسامتى
هههههههههههههههه
واحييكى على كلماتك الجميلة والرائعة
انا طبعا كنت باهرج فى الكلام اللى فوق
بطلى ضحك بقى
خلاص
تقبلى مرورى
واتمنى اكون زائر خفيف
ذو الوجه المبتسم

ادم المصرى يقول...

الله كلام جميل اوى اوى اوى

بجد من يستحق حبك يملك الدنيا كلها

شكلك طلعتى رومنسيه جدا جدا

بجد كلامك كان جميل جدا

تحياتى لكى يا صاحبه القلب الرقيق

dr_samarmar يقول...

كلمات حلوة حلوة حلوة أوى بجد

تسلم ايدك

و ربنا يكرمك و يسعدك يارب :)

Unknown يقول...

وحشتيني جدااااااااا
اول مالقيت ان في وقت و فرصة قلت اعدي عليكي ..
عاملة ايه يا صاحبتي؟؟
:)
اخبارك ايه و بنتك عاملة ايه ؟؟
يا رب يا رب تكوني بخير :)
......

البوست جميل و رومانسي اوي ..
انتي رقيقة جدا على فكرة يا عاشقة الورد .

نفرتارى يقول...

لأنه معك زادكى احساس .
لأنه معك زادكى عشق .
لأنه امير العشاق اصبحتى اميرة معه .

داما الله عليكم السعادة والحب .

تحياتى ،،

نفرتارى

الازهرى يقول...

لأنك لا تغيب رغم المسافات
لأنك معى فى كل اللحظات

انه الحب الذى لا يعترف بالمسافات مهما تباعدت
ادامه الله عليكم وزاده مع الايام

تحياتى دوما

دردشة على الماشى يقول...

الكلام فعلاً جميل ومكتوب باحساس عالى
الحمد لله ربنا تاب عليكى وعلينا من النكد والبعد
كل سنة وانتو طيبين
وربنا يديم المحبة على طول
تحياتى
سلام

الحب فى الله يقول...

السلام عليكم و رحمه الله وبركاته
اتمنى من الله ان يديم عليكى حبك لزوجك و ادعو الله ان يديم سعادتك
دومتى بخير

صدى الصمت - عاشقة الورد - يقول...

مواطن مصرى نايم
مش عارفة أشكرك إزاى على التعليق الجميل الراقى دة
وربنا يوفقك مع (.....) ويديم عليكم المحبة والسعادة بإذن الله
تحياتى

صدى الصمت - عاشقة الورد - يقول...

سلسبيل
الله عليكى أيه الجمال والروعة دى
المفروض ال كتبتيه دة تنشرية فى بوست عشان خسارة يكون فى تعليق عادى
أحييكِ على كلماتك الرائعة وأشكرك على زيارتك الجميلة

صدى الصمت - عاشقة الورد - يقول...

كيارا
أشكرك يا قمر على تعليقك ودعوتك الحلوة
ربنا يسعدك ويحققلك أمانيكى

صدى الصمت - عاشقة الورد - يقول...

romansy
أشكرك على تعليقك المتميز الرقيق وزيارتك الجميلة
تحياتى

صدى الصمت - عاشقة الورد - يقول...

marmar
مرمر الجميلة وحشتينى قوى
ووحشتنى شقاوتك وتعليقاتك الجميلة
وطبعاً كلامك دة من تواضعك لأنك أستاذة فى الرومانسية والكلام الجميل وخصوصاً اليومين دول (وش بيغمز)
ربنا يديم عليكم محبتكم وسعادتكم
سلام ياقمر

صدى الصمت - عاشقة الورد - يقول...

يا مراكبى
جامدة قوى كلمة يأفل ذاك الإلهام دى
إنت عارف إختك إستيعابها بطىء
بالراحة عليا والنبى
هههههههه
ربنا يخليك على التعليق الجميل قوى قوى دة
الكلام دة كتيير عليا والله
سلام

صدى الصمت - عاشقة الورد - يقول...

ذو الوجه المبتسم
وعليكم السلام
هههههههه
والله أنا كنت قربت أصدق
هههههه
أهلاً بك شرفت مدونتى المتواضعة
بالطبع حضرتك زائر خفيف وتنور فى أى وقت
دمت بكل الود

صدى الصمت - عاشقة الورد - يقول...

ادم المصرى
أشكرك على تعليقك الرقيق المتميز
الكلام دة كتير عليا وماأستحقوش
بس عموماً أنا مش رومانسية قوى يعنى ماتاخدش على كدة
دى بس هدنة عشان عيد الحب
ههههههه

صدى الصمت - عاشقة الورد - يقول...

dr_samarmar
ربنا يخليكى يا سمورة على الكلام الجميل دة والدعوة الحلوة دى
ربنا يسعدك ويوفقك دايماً
تحياتى

صدى الصمت - عاشقة الورد - يقول...

قهوة بالفانيليا
شيماء الجميلة وحشتينى جداً جداً
وبأفرح لما بأشوف تعليقك وبتهمنى زيارتك وإنك فاكرانى دايماً
مش عارفة أقولك ايه وأشكرك إزاى على كلامك الجميل قوى دة
أنتى ال رقيقة جداً والله
بنتى بخير ونجحت بتفوق والحمد لله وخلاص الدراسة هتبدأ وربنا معانا
سلام يا أحلى شوشو

صدى الصمت - عاشقة الورد - يقول...

نفرتارى الجميلة
ايه الكلام الجميل الجامد دة
مش جديد على ملكة الرومانسية والإحساس والكوكب الحالم
أتمنى لك السعادة والحب أيضاً مع نصك التانى
تحياتى

صدى الصمت - عاشقة الورد - يقول...

الأزهرى
أشكرك على تعليقك الراقى ودعوتك الجميلة
أتمنى لك السعادة وربنا يوفقك ويحقق أمانيك
تحياتى

صدى الصمت - عاشقة الورد - يقول...

دردشة على الماشى
أختى العزيزة
أشكرك على كلامك الجميل دة من بعض ماعندكم والله
وبعدين قصدك ايه بربنا تاب عليا وعليكوا دى ؟
قصدك إنى خنقتكم مثلاً ؟
يعنى كنت أشترى إخوات من السوبر ماركت عشان يستحملونى ؟
هههههه
ربنا يسعدك إنتى كمان ويديم محبتكم وكل سنة وإنتى طيبة
سلام مؤقت

صدى الصمت - عاشقة الورد - يقول...

الحب فى الله
أهلاً بك شرفتى مدونتى المتواضعة
لإسم مدونتك جميل وهادف
أشكرك على تعليقك الراقى ودعوتك الجميلة
دمتى بكل الود

marmar يقول...

بخخخخخخخخخ
خضيتك صح اعترفي اعترفي
هههههههههههههههههه
مش ناويه تبطلي الوش اللي بيغمز هاااا والفراغات واكمل النقط دي هههههههههههههه
حبيت اكون اول واحده تقولك هاااااااااابي فلانيتن داي يارب
ويكون كل ايامك وحياتك سعاده وفرح طول العمر يارب
وحشااااني يا جميله

اعشق فى الليل ضوء القمر يقول...

والله كنت فاكرك بتتكلمى على الدم غايت لما لقيت أحلام وعمر أمير والحمد لله ملقتش حسين
علافت إنك مكنتيش بتتكلمى عن الدم بس ياترى كنت بتتكلمى على إيه
هههههههأدام الله السكينه و الطمئنينه بينكم
بس إذاى خلتيه ملك على عرش المحبين وفى نفس الوقت أمير العشاق
لملك لأمير إحنا هنقلف ولا إيه
ههههههه
على العموم رأى مش مهم المهم هو مش كده ههههه
تقبلى وافر تحياتى

فكرة من الزمن ده يقول...

جميل احساسك هو اللي بيكتب تسلم ايدك

صدى الصمت - عاشقة الورد - يقول...

marmar
ههههههههه
لأ أنا مش ممكن أتخض من زيارتك الجميلة أبداً وبرضة مابأقدرش أمسك لسانى عن إنى أعاكسك دايماً
ميرسى قوى على أحلى وأول تهنئة فى عيد الحب يارب يديم المحبة بينا على طول
تحياتى يا قمرة

صدى الصمت - عاشقة الورد - يقول...

اعشق فى الليل ضوء القمر
أشكرك على تعليقك الطريف وزيارتك الخفيفة
وطبعاً لازم أألف لأنه فعلاً بوست من تأليفى وأنا براحتى بقى أنعم علية بكل المناصب والألقاب لأنى من وجهة نظرى شايفاه يستاهلهم كلهم
دمت بكل الود

صدى الصمت - عاشقة الورد - يقول...

فكرة من الزمن ده
أشكرك على زيارتك وتعليقك الجميل
نورت المدونة
تحياتى

Rania Lelah يقول...

كلماتك رقيقه اوى بجد
و بجد يا بخته هو بيكى

تحياتى

Esraa Hamed يقول...

ما ارق رومانسية كلماتك
:)
بجد عجباني اوييييييييييي
ما شاء الله عليكي


تحياتي يا قمرة

maha zein يقول...

عم يا عم
ماشي ماشي
اللى اداك يدينا يا سيدي
اللى رماك يرمينا
امممممممممم
بقه اغيب اغيب وارجع الاقي الكلام ده
ماشي
ربنا يسعدك ويديم عليكي السعادة
انا قلت اجي اسلم عليكي
بقالى كتير غايبة عن عالم التدوين ومكنتش بدخل مدونتي حتي
كنت مدية نفسي اجازة النهاردة قلت بقه ادخهل اسلم
يا رب تكوني بخير

ريمان يقول...

السلام عليكم

ايه ده بجد

من جمال البوست قراته اكتر من مره

عجبنى ااوى الاسلوب والاحساس وروعه الوصف

ما شاء الله

والنهايه جميله جدا وفريده من نوعها

صدى الصمت - عاشقة الورد - يقول...

Rania
ميرسى قوى يارانيا على الكلام الجميل دة
من بعض ماعندكم والله
نورتينى ونورتى المدونة

صدى الصمت - عاشقة الورد - يقول...

Esraa Hamed
أسراء الجميلة الرقيقة
أشكرك على كلامك الجميل الراقى والله مش قادرة أقولك تعليقك بيسعدنى قد ايه
تحياتى

صدى الصمت - عاشقة الورد - يقول...

maha zein
أخيراً شرفتينى ونورتينى والله أنا كنت فاكرة إنك زعلانة منى عشان إتأخرت فى الرد على التاج
بس والله موضوع غزة كان متصدر الساحة
وبعدها الفالنتين
لكن بإذن الله هأرد عليه قريب جداً
أشكرك على تعليقك وزيارتك بعد الغياب
تحياتى

صدى الصمت - عاشقة الورد - يقول...

ريمان
وعليكم السلام يا ريمو ياقمر
بجد مش عارفة أقولك ايه الكلام دة كتير عليا وما أستحقهوش
ربنا يخليكى وميرسى على تعليقك المميز
نورتينى

اعشق فى الليل ضوء القمر يقول...

يا عم يا عم إيه الدلع الكبير ده و قصادنا كده عينى عينك يا بختك يا كبير
مبقرش ولا حاجه خالص مالص
ههههههه

الحرامي يقول...

حلو قوي حرف الام دا انا غالبا هسرقو
بس حقيقي الموضوع جميل قوي واسلوبك متميز
انا اول ما ابدلأ اسرق شعر
هجي اسرق الموضوع دا ولحد
ما اسرقه
حرصي علي البلوج مني

Hannoda يقول...
أزال المؤلف هذا التعليق.
Hannoda يقول...
أزال المؤلف هذا التعليق.
Hannoda يقول...
أزال المؤلف هذا التعليق.
Hannoda يقول...
أزال المؤلف هذا التعليق.
Hannoda يقول...

سوري جدا على التعليقات الكتير اللي مسحتها ده

أصل بعد ما بعته لقيته جزّأ التعليق لمجموعة جمل كل واحدة في تعليق منفصل مش فاهمة ليه
-----

بحس ان الامان اللي بنستمده من الاحساس بوجود حد غالي في القلب هو أسهل أمان
و أكثرهم إخلاص
و أكثرهم وفاء و استمرار

وطول ما التواجد مستمر بنلاقي ملامحنا باقية
مابتتمسحش
ما بتتجمدش حتت منها

عجبتني جدا الكلمات و حسيتها بليغة جدا

آسفة على عدد التعليقات اللي اتمسحت

تحياتي

aMr saYed يقول...

المدونة مش محتاجة اني اضيف ليها او ازودها بكلام الثناء لانها مزودة تلقائيا بجد كلمات رائعة يعني اكيد يا سعده يا هناه الي كتبالوه القصيدة ديه الي بتدل على انه ملك قلبك وعقلك و بجد كنت شاكك اني في امرأة رومانسية تستطيع ان تكتب في حب حبيبها بس بعد اما قريت الي كتباه اتزال الشك ده خالص

زيارة اولى ولو تحبي متكنش الاخيرة حتى لو محبتيش برده هاجي تاني اصله مش اختيار انا جاي قهرا

تحياتي

صدى الصمت - عاشقة الورد - يقول...

اعشق فى الليل ضوء القمر
واضح فعلاً إن دة مش قر خالص
ربنا يستر علينا بقى
ههههههه
شرفتنى

صدى الصمت - عاشقة الورد - يقول...

الحرامى
مدام عجبك حرف الإم يبقى أكيد فية حد غالى عندك بيبدأ إسمة بحرف الإم
عموماً حلال عليك الحرف ممكن تسرقة
لكن عاوزة أحذرك إن البلوج بتاعى متراقب بالكاميرات وعملت علية حراسة مشددة
خد بالك وانت داخل بعد كدة
تحياتى

صدى الصمت - عاشقة الورد - يقول...

Hannoda
لية بتتأسفى يا هنودة أنا عارفة ان فية مشاكل كتير بتقابلنا مع النت وبتحصلى كتيير
إنتى تنورى فى أى وقت حتى لو كان التعليق فاضى
كفاية إنك تعبتى نفسك وحاولتى كذا مرة عشان تعلقى دة شرف ليا
كلامك بجد عن الأمان المستمد من الحب الحقيقى هوه ال رائع وحساس وجميل جداً
نورتى مصر يا قمر
تحياتى

غير معرف يقول...

بجد احلى بوست قراته جميلة جداالقصيدة شكلك اتعديتى من ابن عمك وبجد تحفة ومش جزامة ومزيد من التالق الدائم واتمنى زيارتك لمدونتى اللى ليس لها وجود قريبا امضاء رئيسة جمعية المعاقين

صدى الصمت - عاشقة الورد - يقول...

aMr tA3LaB
مش عارفة أشكرك إزاى على تعليقك أنا ماأستحقش كل الكلام الجميل دة كتير عليا قوى
عموماً حضرتك ضيف خفيف على المدونة وتشرف فى أى وقت
الحقيقة مش عارفة مين ال أجبرك على الزيارة وخلاك تقول دة مش إختيارك وإنك أتيت قهراً لكن يسعدنى تشريفك
وأتمنى فى المرات القادمة أن تأتى بكامل إرادتك دون إجبار من أحد
تحياتى

صدى الصمت - عاشقة الورد - يقول...

غير معرف
لولولولولولى
أخيراً دخلتى عندى وشرفتينى
والله نورك غطى على الكهرباء
وكويس إنك عرفتى تعلقى أصلاً دة تقدم كبير وطفرة حضارية فى حياتك العملية
ولو إنى أشك إنك بتحبى الشعر بس متشكرين قوى على الكلمتين الحلوين دول
نردهالك فى مدونتك لما تعمليها إن شاء الله
سلميلى على إبن عمى ،
سلام مؤقت

Safwat Rabea يقول...

ربنا يكومكم وتكتبو من الحاجات دى كتير

Safwat Rabea يقول...

قصدى يكرمكم

صدى الصمت - عاشقة الورد - يقول...

ابو عمار السويفى
حلوة قوى الدعوة دى
بس ياريت تحدد فى الدعوة الجاية هنتكوم فين بالظبط

صدى الصمت - عاشقة الورد - يقول...

ابو عمار السويفى
ماشى يا أفندم
شكراً على التوضيح
أشكرك على زيارتك الأولى وتعليقك الجميل
تحياتى

Esraa Hamed يقول...

في انتظار جديدك
:)

صباح الصباح يقول...

ربنا يهنيكى بجوزك يا فندم وديم عليكم السعادة والفرحة

اعشق فى الليل ضوء القمر يقول...

انا عارف لو قعدنا لبكره مش هنخلص حقه ولا هتخلص الكلمات
مش كفايه كده ونشوف بوست جديد
أنا مش عايز أقر خالص
عايش ومتهنى وفرحانه بيه أنا مش بحسد ولا حاجه
وبقالها كده فى البوست ده كثير من كثرة ما بتحبه مش بحقد لا سمح الله
‘سمعى كلامى ونزلى بوست جديد أنا عارف الواد أعشق فى الليل ضوء القمر عينه يا ستير يا رب عليه إحذرى منه نصيحه أخويه و أنت حره
هههههههههههههههه
هههههههه
(ضحكه شريره)

bastokka طهقانة يقول...

يا سيدي يا سيدي
معلش يا اختي في الاول كده بس بعد كده حتيجي تقعدي جنبي
هههه
اوروفوار

Esraa Hamed يقول...

السلام عليكم

ازيك يا قمر
يارب تكوني تمام

دي دعوة مخصووووص
لحضور توقيع
"أحيانا و أحيانا" يوم 11 مارس 2009
الساعة 7 مساءا
بمكتبة البلد أمام الجامعة الأمريكية

http://www.facebook.com/event.php?eid=133120355079#/event.php?eid=133120355079


اتمني ان تشرفيني بالحضور
:)

تايه في وسط البلد يقول...

يا سلاااااااام

اوعدنا يا رب بتولي الملك بقااااااااااا

صدى الصمت - عاشقة الورد - يقول...

Esraa Hamed
ماشى يا قمر الجديد عن قريب بإذن الله
أشكرك جداً على تشجيعك الدائم ليا

صدى الصمت - عاشقة الورد - يقول...

صباح الصباح
أهلاً بيك يا أفندم شرفت المدونة
أشكرك على زيارتك وتعليقك ودعوتك الرائعة
أتمنى لك السعادة والخير أيضاً

صدى الصمت - عاشقة الورد - يقول...

اعشق فى الليل ضوء القمر
والله كل المشكلة إن الكمبيوتر كان عطلان ومش عارفة أنشر جديد أساساً
لكن عن قريب إن شاء الله
أشكرك على زيارتك وتعليقك اللطيف

صدى الصمت - عاشقة الورد - يقول...

bastokka طهقانة
أهلاً أهلاً نورتينى وشرفتينى
أشكرك على زيارتك وتعليقك الجميل ونصايحك الغالية
تحياتى

صدى الصمت - عاشقة الورد - يقول...

Esraa Hamed
أهلاً يا أحلى إسراء
ألف مبروك ياقمر إنتى تستاهلى أكتر من كدة بكتير
أتمنى لكِ مزيداً من التقدم
أشكرك على الدعوة الغالية وأوعدك إنى هأكون من أول الحاضرين إذا سمحت ظروفى
مش عارفة أشكرك إزاى على إنك إفتكرتينى بالدعوة الحلوة المخصوصة دى
تحياتى

صدى الصمت - عاشقة الورد - يقول...

تايه في وسط البلد
لية بس تايه يا أفندم الوصفة سهلة
هههههههه
أهلاً بك شرفت مدونتى المتواضعة
وطبعاً أكتر حاجة لفتت نظرك فى البوست إنك تتولى الملك
ربنا يوعدك يا أفندم بس إبقى إفتكر الرعايا
تحياتى