الجمعة، 29 أغسطس، 2008

للعلم بالشىء

اليوم وحصرياً ولأول مرة يبدأ فى مصر (فقط) تطبيق التوقيت الشتوى (فى عز الحر و نأحة الشمس!!!!)
والساعة 12 هتبقى 11 وعلى المقيمين خارج مصر المحروسة مراعاة فروق التوقيت والحاضر يعلم الغايب ,
ويبقى الشعر .......
إذا حطم نبضي دمائي و غرق
فتأكد أنه من نار الغرام إحترق ,

وإذا غاب عقلي وجن جنوني
فأعلم أنها ثورة آلامي وشجوني ,

وإذا إنتحر قلبي من العذاب
فذلك لأنه من الهيام ذاب ,

وإذا إختلطت دموعي بماء المطر
فهذا هو نهر الحياة المندثر ,

وإذا سقطت مشاعري فتحطمت
فلأنها من أجل حبك إستسلمت ,

وإذا يوماً قتلتنا الأشواق
فيكفي أننا مُتنا ونحن عُشاق

الخميس، 21 أغسطس، 2008

أ خــيـــراً


ياااااااااه
مش قادرة أصدق 00000 أخيراً جة يوم الخميس ؟ بجد جة؟
مش عارفة لية كل إسبوع بأحس إن يوم الخميس فاضل علية 3 سنين عشان ييجى بالسلامة ودة معناه إن أخيراً مافيش شغل لمدة يومين بحالهم
ماحدش هيكلمنى فى مشاكل الشغل ال ما بتخلصش , مش هأصحى بدرى ومش هأسمع صوت المنبة الغلس ال عاوز الحرق ,
مش هأدور على لبس الصبح ومالاقيش حاجة مكوية وأنزل متأخرة
وأجرى ورا نفسى على السلم عشان أرمى نفسى فى أى مواصلة
أنا : جيزة يا أسطى
؟
السواق(1): لأ ..( مع إنه رايح !!.) أهى غلاسة عالصبح والسلام
,
الميكروباص ال بعدة ........
أنا : جيزة يا أسطى
السواق (2):
الأجرة جنيه
أنا :
ليه ماهى كل يوم بخمسين قرش ؟ ايه ال جد النهاردة ؟
السواق :
إنتى لسة هتفاصلى طب خليكى واقفة بقى
ال بعدة ....... و ال بعدة ....... و ال بعدة (صبرنى يارب )
أنا : (بنبرة إستعطاف ) جــيــزة يـــا أســطــى
السواق(6): خلصى وإطلعى بسرعة الظابط واقف
أنا : أشهد أن لا إله إلا الله .... أخيراً هأركب
وياترى هألحق ميعاد قفل دفتر الحضور وله لأ ؟؟؟؟؟ ربنا يستر
وصلت الشغل ... ايه دة ؟؟؟ حاجة غريبة قوى !!!!!
المبنى زى ما هوة مع إنى صليت صلاة قضاء الحاجة ودعيت إنه يتهد أو يتحرق ( بس وأنا مش جواه طبعاً)
الظاهر ما كنتش بأصلى بزمة,
أمرى لله أدخل أشتغل و خلاص (حاجة تقرف)
ييييية نسيت القلم
الموظف :
ايه يامدام حد ييجى الشغل من غير قلم ؟
أنا : معلش أصلى نزلت مستعجلة
الموظف :
يعنى جايه متأخرة وكمان معاكيش قلم؟؟ ...
موظفين آخر زمن !!!!
أنا : طب ممكن تدينى القلم ال فى إيدك أمضى بيه بس ....
وهأرجعهولك تانى؟
الموظف : آسف جداً ده عُهدَه وما أقدرش أديهولك
أنا : (فى سرى طبعاً) .....
يلعن أبو العُهدَه عالشغل على ال عاوز يشتغل يا أخى.
وللحديث بقية عن فوايد يوم الخميس .

الاثنين، 11 أغسطس، 2008

العودة



أتساءل إن كنت تسمعنى فى صمتى ؟؟
فإننى عندما أصمت أتحدث كثيرآ .... كثيرآ,

أتعجب هل ترى مابقلبى !!؟
فإن داخل صدرى عتابآ طويلآ ....

أشتاق إليك حبيبآ ...
وأحتاجك كثيرآ ... صديقآ ...
وطبيبآ,

بلمساتك تمحو أحزانى ....
وتذوب فى أحضانك كل همومى ,

فى عيناك أرى بريق الحياة ...
وأرى نهاية آلامى ,

هل تشتاق وتتلهف وتذوب ؟؟

هل تحيا من أجلى ؟؟
هل أسكن قلبك مثلما تفيض أنت فى قلبى ؟؟

يا حبيب قلبى
إنى أنتظرك لتعود قريبآ كما كنت .....
حبيبا

الأحد، 3 أغسطس، 2008

عشان نبقى على نور


أهلاً بكم جميعاً شرفتونى ........

أحب أشكر أخى الأكبر المراكبى المغترب على طول وال شكلة هيطول فى الغربة على الإعلان ولأنة أيضاً كان سبب معرفتكم بيا,

وأحب أقول إنى هأعملة قالب كريم كراميل لما يرجع عشان ماحدش يسيح تانى ويقول إنى مادفعتش أجر الإعلان,

وأحب أشكر كل أصحاب المدونات ال إستقطعوا جزء من وقتهم الثمين عشان يدخلوا يقروا ويعلقوا عندى ويشجعونى وينصحونى بجد ,

وعشان نبقى على نور مع بعض من الأول أحب أقول للكل حاجة : أنا والله مش كئيبة أو حزينة أومجروحة على طول أنا بس مابعرفش أكتب لما بأكون سعيدة لأن السعادة شىء لايوصف بكلمات لكن لما بأكون حزينة بأخرج همى كلة فى الورق والكتابة وبأحس بعدها براحة شديدة ,

وحبيت أقولكم الكلام دة عشان ال مش عاوز يكتئب وداخل عشان يفرج عن نفسة وينسى همومة ياريت يمتنع عن قراءة كتاباتى من الآن وكفاية جرعة النكد ال أخدها وهذا إنذار صريح منى بذلك ,

مع وعد منى إنى حأحاول أكتب فرايحى بعد كدة يمكن يطلع منى حاجة تسعدكم ,

وتفضلوا بقبول فائق الإحترام ..... عاشقة الورد