الجمعة، 25 ديسمبر 2009

عندى أمل فيك






إهداء
إلى كل العشاق
ألى كل المحبين
إلى كل المغرمين
إلى كل من يهوى الفن الأصيل والزمن الجميل
رائعة فيروز ( عندى أمل فيك )



وإهداء آخر
كلمات فى الحب وللحب فى مدونتى التانية
عالمى الخاص
http://www.sootek2.blogspot.com/

ولكم حبى وتحياتى

الجمعة، 4 ديسمبر 2009

فضفضة


عندما أريد أن أفعل شيئاً
أجد هذا الشىء يعلق فى ذهنى ويراودنى طوال الوقت حتى أفعلة
وعندما تتسلسل الأحداث فى رأسى وتحدث كما تخيلتها
ينتابنى شعور عارم بالسعادة والنشوة
ينتشر حولى ويسود حياتى طوال اليوم وقد تمتد السعادة للأيام التالية أيضاً
ولكن عندما تتغير الأحداث وتختلف عما كان مرتب فى مخيلتى
أوعندما أتعلق بشىء ويأتى أى إنسان حولى فيرفض أن أفعل هذا الشىء
أتهجم وأحزن فأجدة يسألنى :
هل غضبتى لأنك لم تفعلى ما أردتى ؟
فأجيبة بكل ثقة :
بالطبع لا .... وهل أنا طفلة حتى أغضب هكذا من أى شىء !!!
أنا لست طفلة ... بالطبع انا اتفهم وأتعقل الأمور فلا تقلق
ولكن فى الحقيقة
وعندما أجلس بمفردى أجد نفسى حزينة لدرجة كبيرة جداً
ويتعكر صفو حياتى لأيام عديدة بسبب هذا الحدث التافه البسيط
وينعكس هذا على تصرفاتى التى قد تكون حادة مع الجميع
إننى أعترف
إننى مازلت بعد كل هذا العمر بداخلى تكمن (طفلة صغيرة)
تحتاج إلى كل مايحتاجة الأطفال
تشتاق إلى كل معانى البراءة والنقاء وراحة البال
أشتاق إلى ضحكتى الصافية الخالية من أى هموم
أتلهف إلى هدية ولو ضئيلة جداً
أتمنى كلمة رقيقة ولو قيلت فى العام مرة
أحتاج إلى دنيتى المليئة بالحب الصادق دون مقابل
وأسعى دائماً إلى الصداقة الحقيقية دون منافع
أريد أن أعود صفحة بيضاء لم يكتب عليها الزمان بقلمة أى عبارات
أريد أن أعود لزمن لم تعبث فية السنين والأحداث بنفسى وقلبى
أريد أن أعود إلى الطفولة حتى أجد ذاتى الخالية من أى تشوية
فأعود بها ولها

السبت، 28 نوفمبر 2009

العيد فرخة وبطة و وزة

من كتر الأكل
تم تغيير أغنية العيد فرحة
بالعيد ( فرخة ) وكل سنة وانتم مبسوطين
********************
كلاكيت تانى مرة
أأأأأأأأه يا بطنى
بطنى هتنفجر ....
أنا جاتنى تخمة مركبة
وعندى أنتفاخ وسوء هضم
وتضخم فى المعدة
وإنبعاج فى القولون
وصراخ فى الأمعاء الدقيقة والغليظة
ومظاهرة عاملاها بقية أعضاء الجسم
كتبوا فيها .......
نشيد العيد الكبير :

يا ريتنى ماشفت اللحمة ولا أكلتها
يا ريتى ما تبلتها وظبتها
يا ريتنى ماشويتها ولا سلقتها
يا ريتى ماكنت خرجت من عتبة بيتنا ولا عتبتها
كل ما أزور واحدة تحلف وتتقطع عشان أدوق أكلها
هية الواحدة ليها كام بطن عشان تتحمل أكل ضعف وزنها ؟
كنتم فين أيام رمضان ؟
يا ما أكلنا فى موائد الرحمن
وما فيش واحدة عزمتنى عندها !!!
والله خايفة أبص فى المرايا
ألاقينى شبة الخرفان من كتر أكل لحمها
كل سنة وانتم طيبين
خلاص
أنا هأصوم عن اللحمة
ومش عاوزة حد يجيب سيرتها
ولا يقول إسمها
*******************
لماذا أحبك (بوست على عالمى الخاص)

الخميس، 19 نوفمبر 2009

ولسة بحبها

وكاد الحلم أن يتحقق
ولكن شكلى مش هأعيش
لحد ما يتحقق الحلم دة
وأشوف مصر فى كاس العالم
ومتألقة كدة وبتصعد لحد النهائى
يلا يبقى أحفاد أحفادى يفرحوا إن شاء الله
ولكن مع ذلك
أنا مازعلتش قوى والله
لأنى حسيت إننا كنا نستاهل الفوز
بس ربنا عاوز كدة
وبرغم كل شىء
هية مصر بلدنا
وهتفضل غاليه علينا
وهنفضل نهتف بإسمها
مش عشان خسرنا
نكسر ونخرب فيها
ونلعن ونشتم فيها
مصر أول إمبارح
هيه مصر النهاردة
مافيهاش حاجة إتغيرت
بجمالها وقبحها
بشوارعها وميادينها
وجوامعها ومدارسها
بزحمتها بمشاكلها
بأهلها الطيبين
بحوادث قطاراتها
وكمان تاريخها العظيم
بحلوها ومرها
برضة لسة بحبها

الأحد، 8 نوفمبر 2009

صداقة العمر الجميل


من زمان وإحنا مع بعض
من زمان فاهمين بعض
من أول ماعرفت الصداقة الحقيقية
من غير أى مصالح
من غير أى تزييف أو خداع أو كذب
أختى وصديقة عمرى إل فات ومازالت
وإنشاء الله ستظل صديقة عمرى القادم
هى إنسانة لا تحيا بقوانين غابة الحياة الحالية
إنها تحيا فى عالم خاص من الطيبة والبراءة
تحيا بمعالم وصفات الزمن القديم الجميل
فى زمن إفتقر لك ذلك
من الآخر كدة أنشئت مدونة (إسمها حنين) لينكها أهو

http://cenderelaa.blogspot.com/
ياريت تشجعوها بتعليقاتكم الرقيقة وزيارتكم الغالية
********************************************
ومدام جبنا سيرة الزمن الجميل
لازم أسيبكم مع حاجة جميلة
ترجعكم للإبداعات إل مش هتتكرر ولا هتتعوض
فرقة محمود رضا للفنون الشعبية



وكمان فريدة فهمى وجمال إستعراضاتها
مع إعتذارى لعدم جودة هذا العرض فى بدايتة



ولكم تحيــــاتى

الثلاثاء، 27 أكتوبر 2009

عندنا زوار فى الشغل كتيير

مش عارفة يمكن تكونوا ماتعرفوش شكلهم أو ماشفتوهمش قبل كدة
همة فصيلة الحشرات الورقية والزواحف الجميلة اللطيفة وعلى رأسها
البرص
أيوة مستغربين ليه ؟
عندنا فى المكتب برص لطيف جداً ومجموعة حشرات ألطف منة
بيظهروا ويتجولوا ويأكلوا ويشربوا

وساعات بيولدوا شوية حشرات و(أبراص) صغيرة ولطيفة جداً
أصل (المشتل) إل جنبنا بيسكنة مجموعة أكبر بكتير من الزواحف والحشرات
وإل عندنا دول بقى القلة المنحرفة إل إستطاعت تهرب وتيجى مكتبنا

ولما لقت عندنا تكييف قعدت وماطلعتش وأهم أعضائها البرص
وكل يوم نتباحث ونحاول نحدد نوع البرص ونقول :

طب لو أنثى ماوحشهاش جوزها عشان ترجع المشتل ؟ وله هيه خارجة غضبانة ؟
يا خبر إسود لو جوزها كمان جة عندنا عشان يصالحها
إحنا مش ناقصين حشرات
طب ولو البرص دة ذكر طب فين أهلة ماوحشوهوش ؟
ياخبر إسود لو كان إختار مكتبنا عش الزوجية وناوى يتجوز عندنا
وبيجهز المكان ؟
وعملنا (مباحثات) عن كيفية تطفيشة من المكان وجربنا كل حاجة تخطر على بالكم
مبيدات حشرية و(يدوية) أيضاً
وأخيراً إختفى وعملنا حفلة كبيرة بالمناسبة دى
وبعد 3 شهور لقيناه رجع تانى
ولما سألنا بتوع المشتل قالوا :

ياجماعة دة ماكانش مشى ولا حاجة دة كان عامل بيات شتوى ودلوقت خرج تانى
وتحطمت كل أحلامنا فى تطفيش البرص

وتقدمنا كلنا بطلب نقل من الإدارة .
**** معانى كلمات مابين القوسين :
أبراص : جمع برص
المشتل : مكان فيه زرع كتير

مباحثات : مشاورات
مبيدات يدوية :
عصاية وكوتشى وبعض الأدوات والأعشاب المتنوعة

******************************
( لماذا أحبك ) بوست جديد على عالمى الخاص

الاثنين، 12 أكتوبر 2009

مفتاح غريب ( الجزء الأخير )

لمحة سريعة عما حدث فى الجزئين الأول والثانى من القصة
*الزوجة قررت ترتيب المكتبة المهملة منذ زمن فوجدت مفتاح غريب بين الكتب
* راودتها كثير من الشكوك حول زوجها
*راودتها كثير من التساؤلات والإحتمالات حول المفتاح
*عاد الزوج وهو يحمل وروداً وعشاء فاخر
*رفضت العشاء وقررت أن تواجه زوجها
الجزء الثالث والأخير :
فأخرجت لة المفتاح من جيبها
وقالت فى غضب شديد : ماتفسيرك لهذا ؟

فإبتسم وقال : أين وجدتية ؟
فتعجبت الزوجة من رد فعل الزوج وصرخت :
ليس المهم أين وجدتة ولكن المهم ماذا يخص
ولماذا يختبىء
فضحك الزوج وقال : ألا تذكرين هذا المفتاح مطلقاً !!!!
إنة مفتاح شقتنا فى المعمورة
أتذكرين حين ذهبنا فى الصيف الماضى ولم نجد مفتاح الشقة
وبحثنا عنه كثيراً ثم كسرنا الباب وغيرنا المفتاح ؟
أتذكرين ؟

هذا هو المفتاح القديم اللذى كنا نبحث عنة
لقد أصبح بلا فائدة الآن يمكنك التخلص منه
ثم ما هذا الذى تفعلية ؟
أتشكين فى بعد كل هذة العشرة ؟
كان وقع الصدمة كبير جداً على الزوجة
يا الله ......
كيف لم أذكر هذا مطلقاً
وأين ذهب عقلى ؟
ألهذة الدرجة تعمينى الغيرة ؟
ولماذا إتجهت ظنونى وشكوكى لزوجى بالخيانة ؟
هل أحبة لدرجة أنى لا أحتمل أن يتركنى
أم أخاف منه دوماً وأتوقع خيانتة ؟
دائماً أسمع من صديقاتى عن خيانة أزواجهم
وأخاف كثيراً أن أكون فى موقفهم هذا
وأخاف أن تضيع السعادة منى دون سابق إنذار
وأخاف أن يطعننى زوجى يوماً فأظل أنزف و.......
يقطع صوت الزوج تفكيرها ويقول :
ألن نأكل ثم نحتفل ياحبيبتى
تنظر إلية فى دهشة وتقول : نحتفل بماذا ؟
فيجيب الزوج فى دهشة :
لا أصدق إنك نسيتى
اليوم هو عيد زواجنا العاشر يا أغلى حبيبة

كل عام وانتى بخير وسعادة
ترد الزوجة :
أنا آسفة لقد إنشغلت اليوم ونسيت تماماً
وآسفة على فهمى الخاطىء
وبالطبع من المستحيل أن أشك فيك ولكنه كان مجرد إستفسار
كل عام وإحنا بخير وسعادة ومع بعض دايماً ياحبيبى
*****************
وبعد العشاء والإحتفال نامت الزوجة فى سعادة وطمأنينة
وعندما إستيقظت فى الصباح وبينما هى تجهز للإفطار
قررت أن تحضر عصير البرتقال بجانب الإفطار
مثلما كانت تفعل فى أول أيام زواجهما
وعندما أخرجت العصارة وجدت بعلبتها مفتاحاً غريباً آخر
فنظرت إلي المفتاح وتوقفت بذهول وكادت أن تنهار

تمت
****************
بوست الممنوعات لازال على (عالمى الخاص )



الثلاثاء، 6 أكتوبر 2009

مفتاح غريب (الجزء الثانى)

لمحة سريعة عما حدث فى الجزء الأول من القصة
*الزوجة قررت ترتيب المكتبة المهملة منذ زمن
*وجدت مفتاح غريب بين الكتب
*راودتها كثير من التساؤلات حول نوع المفتاح وماذا يخص وسبب تخبئتة
*راودتها كثير من الشكوك حول زوجها
تابع الجزء الثانى :

تساءلت .....
ماذا أفعل الآن ؟؟؟؟
أراقبة ؟
أم أواجهه ؟
أم أتجسس على مكالماته ؟
أم أفتش فى أوراقة ؟

أم أصمت وكأن شىء لم يكن ؟
إلهمنى الصواب يا الله
يكاد قلبى أن ينخلع من مكانة
ويكاد عقلى أن يختل
كيف خدعنى كل هذة السنوات ؟
وكيف إستطاع أن يمثل دور العاشق البرىء ؟
كيف لم أشعر بكذبة ولو للحظة ظ
كيف كنت أصدق كل مايقول ويفعل بمنتهى البساطة ؟
كيف ألغيت عقلى وغطت الغشاوة عينى ؟
لا .... لن أستسلم لهذة الحياة بعد الآن
لن أقبل أعذاره
ولن أسامحه مهما كانت مبرراته
ولن أرحم توسلاته
فالجرح عميق جداً
وليس بعد الخيانة شىء يبقى
فلأنتظر حين يعود وأواجهة
.......................
وعندما عاد الزوج
كان يحمل بعض الورود وعشاء من مطعم فاخر
وطلب من الزوجة أن يتقاسما العشاء سوياً
حدثت الزوجة نفسها قائلة :
أهذا هو ثمن الخيانة
(بعض المشاعر والورود والأطعمة )
قالت له : لا ..لن أتقاسم معك أى شىء من الآن
وإندهش الزوج إندهاشاً كبيراً
وسألها السبب
فأخرجت له المفتاح من جيبها
وقالت فى غضب شديد : ماتفسيرك لهذا ؟
وللحديث بقية فى البوست القادم

**************************
(الممنوعات) بوست على عالمى الخاص

الاثنين، 28 سبتمبر 2009

مفتاح غريب



تنويه
هذة القصة ليس لها أى علاقة بحياتى الشخصية
ولكنها تجربة قصصية من وحى خيالى
يعنى مش عاوزين حد يفهم الموضوع غلط
-----------------------------------------
كان يوم الأجازة الإسبوعية المعتادة
وعندما إنتهت من كل واجباتها المنزلية المعتادة أيضاً
ومع خروج زوجها الروتينى المعتاد لملاقاه أصدقائة
قررت هى فعل شىء غير معتاد على الإطلاق
قررت ترتيب المكتبة
فلقد أصبحت مهملة منذ فترة
لكثرة المشاغل والمسؤليات
قالت وهى تحدث نفسها أثناء الترتيب :
يا الله كيف غفلت عن منظرها وفوضويتها
كل هذة الفترة ؟!!
وظلت تسحب كتاباً تلو الآخر وتعيد ترتبيهم وتزيح التراب من فوقهم
وفجأة سقط شىء غريب من بين الكتب وأحدث صوتاً رنان على الأرض
وعندما إنحنت لتلتقطة وجدته مفتاح شكلة غريب ولم تره قبل ذلك
قالت وهى تحدث نفسها : ماهذا ؟
مفتاح !!!!
من أين أتى ؟؟؟
ومن الذى أتى به إلى هنا ؟؟
ودققت النظر فية وإتضح لها إنه مفتاح شقة
فقالت : هذا ليس بمفتاح شقتنا
أمن الممكن أن يكون ..........
وتوقفت الكلمات على الشفاه
ودار بعقلها ألف سؤال وسؤال
وراودتها آلاف الشكوك والظنون
أمن الممكن أن يكون هذا المفتاح يخص زوجى ؟
ولماذا يخبئة ؟ أكيد يوجد سبب للتخبئة
هو يعلم تماماً إننى لم أقترب ولن أقترب من هذا المكان
هذا هو المكان الآمن الوحيد لتخبئة الأسرار
هل إشترى شقة ويخفى الأمر علىَ؟
هل يقضى فيها سهراتة كل إسبوع مع أصدقائة ؟
هل تزوج من أخرى وهذا مفتاح شقتها ؟
أم يستثمرها بأى شكل من الأشكال ؟
يا الله ... أيخوننى زوجى بعد كل هذة السنين ؟
ماذا فعلت لأستحق منه كل هذا الكم من الغدر والخيانة والجحود؟
بعد كل هذة العشرة والحب والتضحية يكون هذا جزائى ؟
وتكون هذة مكافئتى ..........
و للحديث بقية فى البوست القادم
****************************************
**( الممنوعات )** بوست جديد على عالمى الخاص

الخميس، 17 سبتمبر 2009

كل سنة وكلكم طيبين


هأ هأ هأ هأ هأ
كل سنة وكلكم طيبين
ولنا بعد العيد عودة
بإذن الله
تحياتى

الثلاثاء، 1 سبتمبر 2009

هنفطر فين النهاردة ؟

كلاكيت تانى مرة
النهاردة انا راجعة من الشغل تعبانة وهلكانة والدنيا حر مووووت
من الآخر كدة مش قادرة أعمل أكل عشان الفطار
أعمل ايه ؟ أعمل أيه ؟ اعمل ايييييييه ؟
ايوة هوه ده الحل التمام

أروح أكبس على ماما و بابا و أنزل عليهم زى البراشوت و أفطر عندهم
إتصال تيليفونى : ترن ترن ، ترن ترن ، ترن ترن
ماما : ألو

أنا : أيوه يا ماما إزيك ..... أخبارك ايه ؟ وحشتينى
ماما : و انتى كمان

أنا : بأقولك ايه يا ماما مدام وحشتك بقى أنا جاية أفطر معاكى النهاردة
ماما : ياريت كان ينفع والله يابنتى بس إحنا معزومين النهارد برة تبع الشغل ونازلين دلوقت ،......
خليها بكرة أحسن سلام .

أنا : سلام .بكرة ؟ هأفضل صايمة لحد بكرة ؟؟؟
أعمل ايه ؟؟؟ اعمل أيه ؟؟؟؟
أيوه .......... أختى حبيبتى
إتصال تيليفونى(2) : ترن ترن ، ترن ترن ، ترن ترن
أختى : ألو
أنا : أيوة ازيك يا أختى
أختى : أهلاً أهلاً عاملة ايه ؟

أنا : كله تمام ، بأقولك ايه
كنت بأفكر آجى أفطر عندك النهاردة أصلك وحشانى قوى
أختى : أخ ... النهاردة ؟ مممممم ماشى تعالى
أنا : ايه مافيش أكل عندكم النهاردة وله اية ؟
أختى : لأ عندى بس أنا هأرجع من الشغل متأخر
وعشان كدة هنأكل سمك جاهز من بره وخلاص
أنا : ايه سمك ؟؟!!!! سمك فى رمضان ؟؟؟
حرام عليكى يا شيخة هوة الواحد ناقص عطش !!!!
أختى : خلاص بلاش النهاردة ممكن تيجى بكرة
أنا : بكرة ؟؟ تانى بكرة ؟؟؟
طيب لما أشوف سلام
ييييه وبعدين.... أعمل ايه ؟؟؟ .....

أيوة وجدتها .... خالتى
إتصال تيليفونى(3) : ترن ترن ، ترن ترن ، ترن ترن
خالتى : ألو السلام عليكم
أنا : وعليكم السلام إزيك يا خالتى
خالتى : مين بيتكلم ؟؟

أنا : أنا بنت أختك يا خالتى نسيتينى وله اية ؟
خالتى : لأ إزاى .... إزيك يابنتى
أنا : كويسة إنتى عامله ايه وحشانى
خالتى : والله أنا مش كويسة
أنا : ليه كدة بس فيه ايه ؟
خالتى : انا تعبانة بقالى يومين عندى أنفلونزا
أنا : ياخبر ألف سلامة عليكى
خالتى : الله يسلمك متشكريين على سؤالك
أنا : العفو يا خالتى إحنا ال متشكرين على البمبة
أأأأأ قصدى متأثرين بمرضك قوى سلام بقى

ايه الحظ النحس دة أعمل ايه ؟؟؟؟؟
أيوة أكيد عمتى فاضية النهاردة
إتصال تيليفونى(4) : ترن ترن ، ترن ترن ، ترن ترن
عمتى : سلامو عليكم
أنا : وعليكم السلام إزيك ياعمتى

عمتى : أزيك أخبارك ايه ؟
أنا : عاملة ايه شكلك مشغولة فى تحضير الفطار صح ؟
عمتى : لأ والله يابنتى دة أنا قاعدة فاضية من الصبح
أنا : يااااه أكيد بقى خلصتى الأكل من بدرى ،
طيب مدام انتى فاضية آجى أقعد معاكى نتسلى وبالمرة نفطر سوا
عمتى : كان على عينى والله يا بنت أخويا بسسسسس .......
أنا : بس اية ياعمتى خير ؟؟؟؟
عمتى : أصل المية مقطوعة من الصبح ومش عارفة أعمل حاجة خالص

خليها بكرة أحسن تكون الميه جت
أنا : ماشى ياعمتى مع السلامة
بكرة ؟؟؟ هوة اية مشكلة بكرة معاهم بالظبط ؟؟؟
يكون فية عيد أو موسم بكرة وأنا ما أعرفش ؟
أعمل ايه ؟؟؟؟ اعمل اييبيية ؟؟؟؟
أيوه الحل أكييييد ...... عند حماتى
ألحق أكلمها مش فاضل وقت كتيير على الفطار
إتصال تيليفونى(5) : ترن ترن ، ترن ترن ، ترن ترن
حماتى : ألو .... ألو
أنا : أزيك يا تنط
حماتى : مين بيتكلم ؟

أنا : أنا مرات إبنك
حماتى : أهلاً إزيك يا حبيبتى
أنا : كويسة أيه الهيصة ال عندك دى يا تنط ؟
حماتى : أصل أنا بأبيض الشقة
أنا : حد بيبيض فى رمضان ؟؟!!!!!
حماتى : أصل الصنايعيه كانوا متفقين معانا يخلصوا قبل رمضان
و طبعاً ما إلتزموش بالميعاد
أنا : ماشى ربنا يعينك سلام يا حماتى
خلاص كل الناس النهاردة مش فاضية يا إما عندهم ظروف ؟؟؟
اية النحس دة ..... ،
ياخبر فاضل ربع ساعة على الآذان أعمل ايه ؟؟؟
أروح فين ؟
أيوة ... وجدتها ..... و جدتها
مافيش غير حل سحرى واحد ومش ممكن يكون عندة ظروف أو مشكلة ..
وأخيراً ......... وبعد تردد
إتنكرت وإتخفيت ولبست نظارة شمس
و نزلت أفطر فى مائدة الرحمّن ال على ناصية الشارع
و رمضان كريم .

السبت، 15 أغسطس 2009

أين المشكلة ؟

يحكى بأن رجلاً كان خائفاً على زوجته
لأنها لا تسمع جيداً وقد تفقد سمعها يوماً ما.

فقرر بأن يعرضها على طبيب أخصائي للأذن ..

لما يعانيه من صعوبة القدرة على الإتصال معها .

وقبل ذلك فكر بأن يستشير طبيب الأسرة قبل عرضها على أخصائي .
قابل دكتور الأسرة وشرح له المشكلة ،


فأخبره الدكتور بأن هناك طريقة تقليدية لفحص درجة السمع عند الفرد
وهي بأن يقف الزوج على بعد 40 قدماً من الزوجة
ويتحدث معها بنبرة صوت طبيعية ..
إذا لم تستجيب إقترب 30 قدماً ،
إذا لم تستجيب إقترب 20 قدماً،
إذا لم تستجيب إقترب 10 أقدام
وهكذا حتى تسمعك.

وفي المساء دخل البيت ووجد الزوجة منهمكة في إعداد طعام العشاء في المطبخ ،
فقال الآن فرصة سأعمل على تطبيق وصية الدكتور.

فذهب إلى صالة الطعام وهي تبتعد تقريباً 40 قدماً ،

ثم أخذ يتحدث بنبرة عادية وسألها :
"يا حبيبتي.. ماذا أعددت لنا من الطعام؟"

ولم تجبه..!!

ثم أقترب 30 قدماً من المطبخ وكرر نفس السؤال:
"يا حبيبتي.. ماذا أعددت لنا من الطعام؟"
ولم تجبه..!!

ثم أقترب 20 قدماً من المطبخ وكرر نفس السؤال:
"يا حبيبتي.. ماذا أعددت لنا من الطعام؟"
ولم تجبه..!!

ثم أقترب 10 أقدام من المطبخ وكرر نفس السؤال:
"يا حبيبتي.. ماذا أعددت لنا من الطعام؟"
ولم تجبه..!!

ثم دخل المطبخ ووقف خلفها وكرر نفس السؤال:
"يا حبيبتي.. ماذا أعددت لنا من الطعام؟"
فقالت له …….

"يا حبيبي للمرة الخامسة أُجيبك إنه دجاج فى الفرن".

إن المشكلة ليست مع الآخرين أحياناً كما نظن ....

ولكن قد تكون المشكلة معنا نحن
*لأنك معى (بوست على عالمى الخاص)*

الأربعاء، 5 أغسطس 2009

ايه الحر دة ؟

ايه الحر دة ؟
ايه كل الصهد دة ؟
مش ممكن بجد
أنا خلالالالالالالاص إتبخرت
وبقيت بواقى إنسان مجفف
كل يوم أصبر نفسى وأقول بكرة الحرارة هتنخفض

بكرة الجو يبقى جميل
بكرة الجو هيتحسن
ايه بقى فيه ايه ؟
هوة بكرة دة ما بيجيش ليه ؟
أنا تعبت جداً جداً جداً

وبأتعب أكتر وأكتر لما بأدخل من باب شقتنا
بعد يوم طوييييل قوى فى الحر والصهد والفرهدة والمرمطة
وألاقى حوض سمك الزينة فى وشى
وأشوف السمك بيبلبط فى الميه ومش على بالة خالص
ومش حاسس بالبنى آدمين ال عايشين معاه فى البيت
بأحس إنه قاصد يغيظنى ويستفزنى
وساعات بأشوفة بيطلعلى لسانه كمان
رحمتك يااااااارب
أمال هنعمل ايه فى الصيام فى رمضان ؟؟
قوينا وهونها علينا يا أرحم الراحمين

الأحد، 26 يوليو 2009

إعلان هام

أتشرف بصفتى الشخصية اليوم أن أدعوكم لحضور حفل توقيع
المجموعه القصصية لأخى الأكبر المغترب

المهندس أحمد ثروت القاضى
صاحب مدونة ( يا مراكبى )

وهى بعنوان ( الحياة بدون كاتشاب )

وذلك يوم الخميس القادم الموافق30 يوليو في تمام الساعه السابعة مساء وحتى الساعه الثامنة والنصف مساء
وذلك بمكتبة حنيـــن بجاردن سيتى
وعنوانها 7 شارع الديوان المتفرع من شارع القصر العينى بجوار القصر الفرنسى بالقاهرة
.
الوصف للوصول
من محطة مترو السيدة زينب الاتجاه الى شارع القصر العينى
ثم نتوجه يمين فى اتجاه ميدان التحرير اول شارع بعد القصر الفرنساوى على الشمال ..
ومن محطة مترو التحرير اخر شارع القصر العينى على اليمين قبل القصر الفرنسى.
أتمنى أن أراكم جميعا بإذن الله تعالى .. موعدنا هناك

ولو أنى أعتقد أن الحياة بالمايونيز قد تكون أفضل فى بعض الأحيان
ولكنها وجهة نظر أخى الحبيب

تحياتى لكم جميعاً

السبت، 18 يوليو 2009

حكاية الكمبيوتر

لما الكمبيوتر إتعطل حسيت فجأة إن إبنى تاه
وماعرفتش أعمل ايه
حسيت بفراغ فظيع
وكان ناقصنى حاجة كبيرة ومهمة قوى
طب أعمل ايه ؟ أعمل ايه ؟
غسلت وطبخت ورووقت
ايه ده ؟؟؟
مال اليوم ممل قوى كده ليه ؟؟
خلاص أقوم أمسح الشقة
ايه ده ؟
لسه فاضل وقت طوييييييل
طيب أعمل كيكة مادام لسه بدرى
خلصت وقعدنا نشرب الشاى ونأكل الكيك
وفتحنا ال tv ولأول مرة من زمن نتجمع
ونأكل ونشرب ونقعد كلنا مع بعض
وكل واحد يتكلم مع التانى
غريبة !!!! بقالنا كتييير ما إتكلمناش مع بعض
وبعد ماخلصنا
بنتى قالت ماتيجوا نلعب كوتشينة ؟
قلنا ماشى ما هو مافيش حاجة تسلينا
قعدنا نلعب ونضحك ونتسلى
غريبة !!!!! كان بقالنا كتييير
ماضحكناش ومالعبناش مع بعض
وتانى يوم خرجنا نتفسح
أهى دى برضة كانت غريبة
من زمان ماخرجناش مع بعض
الحقيقة إكتشفنا إننا كنا بنشوف بعض كل يوم
بس كنا بعييييد عن بعض قوى
وإكتشفت إن دة عيب قاتل من عيوب النت
ومن يومها قررت أنى

* أنظم وقتى
*أهتم أكتر بحياتى الأسرية
*أضع أولويات لأهمية الأشياء فى حياتى
*لا أنجرف وراء النت أكثر مما يجب
*أحاول أتعرف على من أراهم دائما ً

ولا أعرفهم جيداً من الداخل

وياريت إنتم كمان تحاولوا تعملوا كده
تحياتى

الخميس، 2 يوليو 2009

إيه إل حصل ؟

إمتى الكلام بيخلص بينك وبين حد كنت ما بتزهقش من كتر الكلام معاة ؟

وايه الأسباب إل بتخليك فجأة مش لاقى كلام تقولة
ومش لاقى موضوع تفتحة معاة ؟

وفجأة تحس إن التواصل بينكم إتقطع
وإن المواضيع خلصت والقواسم المشتركة بينكم إختفت

ليه بدأت تزهق منه ومن طريقتة ؟
وبالتدريج مابقاش يفرق معاك وجوده من عدمة ؟

ليه مابقاش أول واحد يجى على بالك لو عاوز تأخد رأي حد فى حاجة ؟
لية مابقتش تحب قعدته وكلامة وطريقتة ؟

أيه ال حصل خلاك تبعد عن حد كنت متخيل
إنك مش هتقدر تستغنى عنة فى يوم من الأيام وتحت أى ظروف
وياترى مين بيعوضك عن غيابة ؟؟؟

ياترى بتشكى همك لمين
وبتفضفض مع مين ؟

وله خلاص ماباقاش عندك وقت وجهد حتى للشكوى والفضفضة؟
حصلك ايه ؟ رد عليا
*************************
أسئلة حائرة ( بوست جديد )
على عالمى الخاص

الثلاثاء، 16 يونيو 2009

بوست إستثنائى

النهاردة يوم مختلف بالنسبالى
والبوست دة إستثنائى
لأن النهاردة بقالى سنة بالظبط فى عالم التدوين والمدونات
يا خبر بقالى سنة ؟؟؟
أيوة عدت سنة
معقول ؟؟؟

عموماً أنا مش عارفة أقول ايه
بأشكر ربنا إنه وفقنى وعصمنى من كتابه اى شىء سيىء
ومش عارفة أشكركم إزاى


بجد بأشكر كل واحد فيكم أخد ولو جزء صغير من وقتة
عشان يكتب تعليق عندى حتى ولو كان نقد بكل أشكاله

بأشكر كل ال ساعدنى ووقف جنبى وشجعنى على الإستمرار
وسعيدة جداً بكل الصداقات إل كونتها مع أغلب المدونين

وبأخص بالذكر زوجى الحبيب لسعة أفقة وتفهمة وعدم إعتراضة
ولأنه ترك لى حرية التعبير عن أفكارى وهواياتى دون قيود أو شروط

وشكر خاص كمان لأخى الأكبر ( المراكبى )
والسبب حأحكيهلكم فى تاج جالى من
د\ سمر صاحبة مدونة فكرة وقلم وحلم
ولقيت إن دى افضل مناسبة أجاوب عليه فيها

*بدأتِ التدوين إمتى؟؟ ودخلتِ العالم ده إزاي؟؟
أنا بأكتب من زمان قوى كهوايه
وكان أخى المراكبى ( أخويا والله بجد مش كدة وكدة )
كان بقاله سنتين فى عالم التدوين وكنت بأدخل كقارئة
ثم توكلت على الله وأخدت موافقة زوجى وأنشئت المدونة
ولما أخويا عرف بالموضوع عمل إعلان كبير فى مدونتة
عشانى وبدأت الناس تعرفنى ( يعنى كان عندى واسطة )

*إيه كان إنطباعك ف البداية؟

فى البدايه كان هدفى إنى أقيم كتاباتى وأعرف مستوايا الحقيقى دون مجاملات وكنت حاسة إن هيقابلنى هجوم وإستهزاء
بس الحمد لله لقيت إستحسان من ناس كتير
*مين أكتر حد بتحب تعليقه عـ البوست الجديد؟؟
مش هأقول ال بأحبهم عشان ماحدش يزعل لكن
ممكن اقول أكتر حد بأخاف من تعليقة وبأنتظرة
هو : أخويا المراكبى
وكمان أكتر حد بأحترم تعليقة هم :
1- شيماء على صاحبة مدونة ( قهوة بالفانيليا )
2- إسراء حامد صاحبة مدونة ( أحياناً وأحيانا ً )
والسبب إن همه دول أول إتنين علقوا عندى وشجعونى
فى عالم التدوين و من قبل أى إعلان يعمله أخويا
*إيه أهــــم حاجة إتعلمتها في عالم التدوين؟؟
أتعلمت إن مش كل الناس وحشة
وعرفت إن فيه ناس كتير فى البلد موهوبة بجد
وإن ممكن الناس تكسب تكون صداقات عن طريق
التواصل فكرى وليس وجهاً لوجة

* إيه أكتر حاجة كرهتها؟؟
إن ساعات فيه ناس بتتدخل فى شئون الآخرين أكثر من الازم
وفيه ناس داخله عالم التدوين لملء الفراغ والتسلية فقط
أو نشر السموم فى صورة ألفاظ وأفكار بذيئة
*حاسس إن التدوين ليه تأثير؟
بالطبع التدوين سلاح ذو حدين
ممكن يستغل بطريقة صحيحة وبناءة أو سيئة وهدامة
وعلى المستوى الشخصى
حسيت بإختلاف فى تفكيرى وشخصيتى
وأصبحت ملمة بالأحداث الجارية
وحسيت كمان براحة نفسية
*تهدي التاج لمين؟
مش هأهديه لحد لأنه قديم جداً
وكل الناس تداولتة وجاوبت عليه
بأشكركم جداً
مش عارفة إستحملتم كل الرغى دة إزاى

الاثنين، 8 يونيو 2009

السنة إل فاتت

لما كنت بأروح الشغل السنة إل فاتت

كنت أول ما أركب الميكروباص أصدع وأتعب
من كتر رغى الناس وتهريجهم وأزهق وأقول :
إمتى أنزل عشان دماغى تستريح
،

وساعات أكتم ضحكى جوايا
من كتر كلامهم الظريف
وأبقى عاوزة السكة تطول عشان أسمع أكتر .


*******

لكن دلوقت يا حضرات
لما بأركب الميكروباص
بعيد عنكم وعن السامعين أجمعين
بأشوف الناس مكتئبة جداً وقرفانة
ومش طايقة حد يقولها صباح الخيرولا حتى إزيك
وتلاقى صمت رهيب طول السكة وهدووووووء قاتل
وممكن لو رميت الإبرة على الأرض ترن


حتى السواق مابقاش يشغل الراديو
ولو غلط وشغله ،
تلاقى ميت واحد يزعق ويقول :
وطى ياعم هوه إحنا ناقصين عالصبح حرام عليكم

كل الناس بقت زهقانة ونازلة بالعافية
ومش مستحمله أى مناقشة


ولو غلطت وإتجرأت وفتحت حوار مع أى حد
هيتفتح ومايتقفلش عن :


حالته إل مش عاجباه وعن غلاء الأسعار
وزحمة المواصلات ورغيف العيش
وفاتورة الكهرباء وفاتورة التيليفون
والثانوية العامة وهدوم المدارس
ولبس العيد وياميش رمضان
والبنزين والأدوية
والخضار والفاكهة
و و و و و و و

لحد مايحصل حاجة من الأتنين :

يا إما سواق الميكروباص يجيله تخلف عقلى من كتر إل سمعة
ويتقلب من فوق الكوبرى (قضاء و قدر)

يا إما توصل مشوارك وتنزل وانت مش مركز خالص وتايه من كتر الهم والغم إل سمعته

وتيجى تعدى فتخبطك عربية (تكون سريعة)

وفى كلا الحالتين

إنت إستريحت من كل مشاكلك وهمومك إلى الأبد
وإنا لله وإنا إليه راجعون .

************
( المستحيل ) بوست جديد
على عالمى الخاص

الاثنين، 25 مايو 2009

عروستى


لما كنا صغيرين ماكانش عندنا دش ولا كمبيوتر و لا بلاى إستيشن أو حتى ووكمان(mp3)
كنا بنلعب ألعاب طفولية بريئة مافيهاش وحوش وأشباح أوأبطال يوجى والنينجا وبيكيمون
كانت جدتى بتحكى حواديت غريبة وكنا بنصدقها ونستناها
وفى يوم جابت جدتى قطعة قماش وبكرة خيط
وقعدت تخيط وتفك وتخيط وأنا بأتفرج مش فاهمة فية أيه ؟
و فى الآخر لقيتها عملت من القماش والخيط عروسة
كان وشها طويل شوية وشعرها غريب وملامحها ملخبطة شوية




بس أنا حبيتها قوى وإرتبط بيها جداً
كنت بأخدها معايا فى كل مكان ،
وكانت بتأكل معايا وبتنام فى سريرى
وأقعد أحكيلها حواديت جدتى
ولما أزعل أشكيلها همومى
كنت بأحس إنها فاهمانى وحاسة بيا
ماكنتش أعرف أعمل أى حاجة
غير لما ألاقيها جنبى
وفى يوم صحيت مالاقتهاش
دورت عليها فى كل مكان
وقلبت كيان الشقة عشان آلاقيها
و سألت عليها كل الناس
لكن ما فيش فايدة ماحدش شافها
وماحدش قاللى على مكانها
وماحدش فاضى يتكلم معايا
وفى اليوم دة ولما الليل جه
عرفت إن جدتى ماتت
وفى اللحظة إل عرفت فيها
كانت بداية النضج والمسؤلية
ونهاية عهد البراءة و الطفولة
-----------
العودة بوست جديد على عالمى الخاص

الجمعة، 8 مايو 2009

تنويه واجب عشان اللخبطة

الحقيقة أنا ماكنتش ناويه أعلن حالياً عن مدونتى التانية

لأنها مازالت فى مرحلة التجهيزات النهائية

لكن لقيت أصدقاء المدونة متلخبطين

ومش عارفين أنا بأعمل ايه

وعشان كدة نشرت التنويه دة

أولاً : أحب أشكركم على إهتمامكم ومتابعتكم الجميلة

وعلى تشجيعكم الدائم وحرصكم على الصداقة الجميلة

ال نشئت بينا رغم بعد المسافات

ثانياً: أحب أوضح إن المدونة الجديدة

هتكون مخصصة لكتابة الشعر فقط

أما مدونتى الرئيسية فستظل موضوعاتها متنوعة كما هى

ولذلك قررت جمع كل ماسبق نشرة من الأشعار على مدونتى الرئيسية

خلال الفترة الماضية ونشرة فى مدونتى

عالمى الخاص http://www.sootek2.blogspot.com


ثم سأقوم بعد ذلك بنشر ماهو حديث بإذن الله

ولذلك سوف تجدون بعض التعليقات السابقة فى بعض الأحيان

أشكركم على سعة صدركم

و لكم تحياتى

الأربعاء، 29 أبريل 2009

الفن الحقيقى

تحية لزمن الفن الجميل
والجيل المبدع
إل مش هيتكرر
ومش هيتعوض
وإل أنا بجد بأمووووووت فيهم

ولكم تحياتى


الأحد، 19 أبريل 2009

حاجة مش معقولة



لأ .. لأ ..لأ يا جماعة
ماتحاولوش تأثروا عليا


لأ .. لأ ..
أنا قلت مش هأنشر بوست فى شم النسيم
يعنى مش هأنشر بوست

خلاص الموضوع دة إنتهى ومافيهوش نقاش
بصراحة أنا مش فاضية خااااااالص

يعنى بزمتكم مين هيلون البيض بالروعة والجمال دة ؟


مافيش فنانة غيرى طبعاً
!!!!!!!

وبعدين يعنى مين هينظف الفسيخ والرنجة ؟
العمل الجبار العظيم دة محتاج واحد محترف

( إل هوه أنا برضة )


لأ ... لأ بجد ماتتحايلوش عليا أكتر من كدة
أنا مابتنفعش معايا الطريقة دى


يعنى أسيب تقطيع البصل و أروح أنشر بوست ؟ ؟

مش معقول خالص

وبعدين أنا لسة ماعملتش كمان الترمس والحمص
خلاص ياجماعة لوسمحتم ما تضغطوش عليا

أنا قررت إنى مش هأنشر بوست

وأنا كلمتى ماتنزلش الأرض أبداً


أروح بقى أخلص إل ورايا
وكل سنة وإنتم طيبين

الجمعة، 3 أبريل 2009

ضع الكوب وإرتاح قليلاً


في يوم من الأيام كان محاضر يلقي محاضرة عن التحكم بضغوط وأعباء الحياة لطلابه
فرفع كوباً من الماء وسأل المستمعين :
ما هو في اعتقادكم وزن هذا الكوب من الماء؟
وتراوحت الإجابات بين 50 جم إلى 500 جم

فأجاب المحاضر:

لا يهم الوزن المطلق لهذا الكوب ، فالوزن هنا يعتمد على المدة التي أظل ممسكاً فيها هذا الكوب

فلو رفعته لمدة دقيقة لن يحدث شيء ولو حملته لمدة ساعة فسأشعر بألم في يدي،

ولكن لو حملته لمدة يوم فستستدعون سيارة إسعاف.

الكوب له نفس الوزن تماماً، ولكن كلما طالت مدة حملي له كلما زاد وزنه.


ومن هنا أستنتج الآتى :
لو حملنا مشاكلنا وأعباء حياتنا في جميع الأوقات

فسيأتي الوقت الذي لن نستطيع فيه المواصلة،

فالأعباء سيتزايد ثقلها. فما يجب علينا فعله

هو أن نضع الكوب ونرتاح قليلا قبل أن نرفعه مرة أخرى.
فيجب علينا أن نضع أعباءنا بين الحين والآخر
لنتمكن من إعادة النشاط ومواصلة حملها مرة أخرى.

فعندما تعود من العمل يجب أن تضع أعباء ومشاكل العمل ولا تأخذها معك إلى البيت،

لأنها ستكون بانتظارك غداً وتستطيع حملها.

-----------------------------------

هذة القصة منقولة عن إيميلى

بعثها لى أخويا المراكبى

ونشرتها النهاردة مخصوص

عشان حبيت أقوله

كل سنة وإنت طيب يا حبيبى وعقبال 100 سنة
happy birth day to hamada

السبت، 21 مارس 2009

هدية صغيرة

هدية صغيرة ومش قد المقام

لكل أم تعبت وسهرت وربت
قـلـقـت إستحملت وضحـت
لكل أم شقـيـت وصبـرت

ولكل روح أم طاهرة
فى كل مكان فى العالم

بأهديهم قصيدة
للشاعر :
محمود سلطان المراكبى

يمكن نقدر نوفيهم حاجة صغيرة من حقهم علينا

من نبضةِ القلبِ من أعماق وجداني
أهبتُ بالشعرِ أن .... هيا , فلبّاني

في عيدِ أُمي , وفي آفاق روضتها
صدحت علّي أوفي بعضَ عرفاني

رأيتُ في عيدها الدنيا يجملها
فصلُ الربيعُ فجاءت عطر ريحان

لو أن حادثةٌ باتت تؤرقني
لبات طرفك مُضنى غير وسنان

أو أن هماً عميقاً بات يُثقلني
حملتِ عني أشجاني وأحزانى

أُماه , لستُ أوفي بعض مكرمة
ولو أفضت بإطراء وشُكران

أُماه , أنت حياتي , أنت منبعها
لولاك ما كنتُ في الدنيا بإنسان

حملتني بجوار القلب حانية
وصُنتِني في حنانٍ بين أحضان

الجمعة، 13 مارس 2009

عاوزين نخلص من اليوم دة


أزيكم أخباركم إيه مع أيام الإسبوع ؟
فاكرين لما قررت ألغى يوم الجمعة
وسميناه ملحق الخميس الإسبوعى ؟؟
(راجع بوست نتيجة الأنتخة )

الحقيقة حصل عليّا هجوم شامل
وإتصالات مكثفة ترفض الحدث

وغضب شديد وتنديد وشجب
من عدد كبير من أصدقاء المدونة

ولأن مدونتى تتمتع بالديموقراطية
فعملت إجتماع قمة مع نفسى وقررنا ( أنا ونفسى )
إننا نرجع يوم الجمعة مكانه حقناً للدماء
------ (دمائى أنا طبعاً )

ونلغى يوم الثلاثاء فقط وطبعاً أنا شفت وسمعت
ترحيب وتصفيق حاد من أغلب المدونين بالفكرة دى

غريبة !! مش عارفة يوم الثلاثاء عامل للناس إيه ؟
مافيش حد عاوزة ومافيش حد إعترض بل بالعكس
أغلب الناس إنبسطت من فكرة إلغاؤه من أيام الإسبوع

يكونش قتل قتيل وله يكون إرهابى وله حاجة ؟؟؟؟

الحقيقة أنا كنت ناوية أخصصلة بوست
عشان أشرح أسبابى فى إلغاؤه من أيام الإسبوع
لكن لقيتة مش مستحمل ياعينى إنى أقطّع فى فروتة
وكفاية إل شافه وسمعه (ربنا يعينه)

أنا شايفة إنه هيلم شنطتة من سكات
وهينسحب من موقعة فى هدوء
--------------------
وفى الحالة دى
بعد رجوع يوم الجمعة وإنسحاب يوم الثلاثاء
قررنا ( أنا ونفسى طبعا ً) الآتى :
1- تقديم يوم الأربعاء ليحل محل الثلاثاء .

2- تقديم يوم الخميس ليحل محل الأربعاء .

3- تقديم ملحق الخميس الإسبوعى ليحل محل الخميس .

4- تثبيت يوم الجمعة وإعادتة لموقعة القديم .
ليصبح الإسبوع (من الآخر كدة):
السبت ، الأحد ، الإثنين ، الأربعاء ،
الخميس ، ملحق الخميس ، الجمعة
.

5- تطبيق وتنفيذ هذة المذكرة إعتباراً من تاريخ صدورها .

6- يتم نشر تنوية فى جميع وسائل الإعلام لمنع حدوث
بلبلة وتضارب فى خط سير العمل و الإنتاج .

7- تعيين حراسة على يوم الثلاثاء إلى أن يتم
إلحاقة بمتحف الفن المصرى القديم تخليداً لذكراه .
--------------------------------
إنتهى البيان

الاثنين، 2 مارس 2009

ربنا يستر

أولاً : مش عارفة أقول اية ؟؟؟
البوست إل فات جالى كمية حسد ونم وقر كبييير جدااااً
(كل واحد حسد طبعاً عارف نفسة)
والحمد لله الكمبيوتر ما إستحملش وإتعطل
ودة كان سبب تأخيرى فى نشر أى بوست تانى
وعاوزة أقول ياجماعة إن البوست إل فات دة
كان غلطة مش هتتكرر
وكان بمثابة
(جامدة بمثابة دى )
هُدنَة بمناسبة عيد الحب
وتوبة إن كنت أنشر بوست عن الحب تانى
وربنا يستر على باقى الشقة وتفضل سليمة

**************************
ثانياً : كان لازم أقول سامحينى وماتزعليش
لمها زين صاحبة مدونة (إنها الحياة )
لأنى إتأخرت كتييير قوى فى نشر التاج بتاعها
بس الظروف والأحداث كانت أقوى مننا جميعاً فى الفترة الأخيرة
وكمان التاج دة دسم جداً وفية أسئلة صعبة
وبأحب بجد أشكرها جداً جداً على هديتها

بسم الله الرحمن الرحيم (نبدأ)
1- لو كان ينفع تختار عصر تعيش فيه هيبقى انهى؟ ومين الحاكم؟
كان نفسى قوى أعيش فى عصر الفراعنة وأكون طبعاً من طبقة الحكام عشان أجهز لنفسى مقبرة فرعونية مليئة بكل خيرات وكنوز الأرض وتتنحت تماثيلى فى كل مكان
وكمان عشان أعرف سر التحنيط وبناء الهرم ولعنة الفراعنة

* طبعاً كنت عاوزة أعيش فى عهد رمسيس التانى
وياسلام لو يسعدنى الحظ وأكون أختة مثلاً

.2- إيه اكتر حاجه بتحبها فى رمضان؟
بحب الطقوس والروحانيات والبركة والتدين ال بيسيطروا على أغلب الناس فى شهر رمضان

3- اوصف أجمل فطار ممكن تفطره؟
أساسى لازم يكون موجود شوربة ساعت الفطار
وياسلام لو محشى ورق عنب أو كرنب وبطة محمرة
نبقى متشكرين ليكم وكدة تمام قوى

4- لو انت حاكم هتكون عادل ؟ وهتعرف ازاى ؟
بمنتهى الصراحة :
لأ طبعاً مش ممكن أقدر أكون حاكم عادل
لأن عددكم كتر قوى قوى قوى
وإستهبلتم فيها على الآخر
هوة أنا هألاحق على مين وله مين وله مين ؟؟
ربنا يتولاكم بقى برحمتة

.5- مين أكتر اعلامى بتحبه؟
حمدى قنديل - منى الشاذلى

6- لو ممكن شغلانه تانيه تختار ايه؟
لو مجبرة أشتغل مش هأختار غير تخصصى لأنى بأعشقة
ولو هأغير تخصصى أحب قوى
أقعد أربى العيال وأأنتخ فى البيت

.7- تانى بلد تحب تعيش فيه بعد مصر ؟
كندا - فرنسا

.8- اوصف ترتيبات أجمل فرح ممكن تحضره؟
أجمل فرح من وجهة نظرى لما بيكون المعازيم فرحانين للعرسان من قلبهم ومش جايين يأكلوا ويطلعوا القطط الفطسانة فى العرسان
لكن جايين يفرحوا معاهم من قلبهم

9- بتراعى كلام الناس والقيل والقال؟ وليه؟
أكيد طبعاً إحنا مش عايشين فى صحراء ورأى الناس مهم وخصوصاً لما بيكونوا قريبين منك ويهمهم إنك تتغير للأحسن

10-صحيت من النوم لا موبايل ولا كمبيوتر ولا كاميرا ديجيتال ورجعنا لعصر الحصنه والحمام الزاجل؟
ياسلالالالالالام أحلى حاجة والله إن الواحد يريح دماغة شوية من التكنولوجيا ال هرشت دماغنا وبعدتنا عن بعض
بس موضوع الحصنة والحمام الزاجل دة صعب قوى لأن ال ممكن يوصل فى أقل من الثانية هيوصل فى شهر وطبعاً ممكن فى الشهر دة تحصل تغيرات كتيرة قوى للأسواء لو الخبر أو الإنسان ماوصلش فى الوقت المناسب

11-لما بتحب تهرب من كل حاجه بتروح فين ؟
لو أمكن أروح مكان بعيد مافيهوش حد وقدامى بحر واسع فاضى
لو ما أمكنش بأقفل عليا غرفتى وأقعد على السرير وأضلمها خالص

.12-امتى أول مره أخدت فيها نفس وقلت ياااااااه أنا كبرت؟
لما أمى إتوفت حسيت فجأة إنى كبرت أو انى لازم اتصرف زى الكبار رغم صغر سنى

.13-بتشرب سجاير ولا لا؟ وايه رأيك فى الرجاله والستات اللى بتشرب؟
أنا طبعاً ما بأشربش السجاير ومابأطيقش ريحتها
أما رأيى فى الناس ال بتشربها
مش هأقدرأقولة وأحب أحتفظ بيه لنفسى
حقناً للدماء

.14- بتعرف ايدك الشمال ازاى؟
بأعرفها لأنى بأعمل بيها كل حاجة
لأنى ( شوله)

.15- اكتر اله موسيقيه بتحبها؟
الجيتار والكمان

.16- ليه الذوق والنخوه اتعدموا؟
لان فيه حاجات كتيير قوى إتغيرت والمقاييس والمعايير إختلت فى الزمن دة
والذوق والنخوة أصبحت أشياء يُلام عليها الفرد إذا فعلها

.17- ايه الحاجه اللى لو حصلت هتبقى سعيد ؟
إن أشوف بنتى وجوزى أحسن ناس فى الدنيا

18- تحب أرض زراعيه ولا اجنس عربيات ولا كام عماره ولا فلوس فى البنك؟
فلوس فى البنك
.19- تحب؟ البحر ولا النيل؟
بأحب البحر قوى فى النهار
وبأخاف من منظرة هوة والنيل بالليل
مركب ولا طياره؟
طيارة
.شخص مجنون ولا عاقل؟
عاقل فى امور الحياة اليومية
مجنون فى الحب
.
تقرا كتاب ولا تتفرج على فيلم ؟
كتاب طبعاً

التاج لمين؟
طبعاً أولاً : أهدية لجوزى شيكابالا
وثانياً : السؤال دة إجابتة مشكلة كبيرة
لأن فية ناس كتير بتتضرر من إهداء التاج ليها
وفيه ناس موصيانى إنى ما أهديهولهاش
بصراحة مش عارفة أعمل ايه ؟؟
وعشان كدة قررت أهدية لكل المدونين
ال أنا ضايفاهم عندى فى الشمال
وكمان ال ضايفاهم فى اللآخر تحت
أنا كدة عدانى العيب كلكم معزومين علية
وال يعجبة ويحب يجاوب عليه يجاوب
بس خلاص
تحياتى

الأربعاء، 11 فبراير 2009

لأنك معى


لأنك معى
لأنك متواجد داخل أنسجتى
تحتل شراينى

منتشر فى أجزائى
تتمدد فى كيانى

لأنك تحيا فى قلبى
وتأسر عالم أحلامى

لأنك أنت رسول الحب
ونبض القلب
وعشق العمر

لأنك لا تغيب رغم المسافات
ولا تهون رغم الصعوبات
ولا تنسى أجمل الذكريات
لأنك معى فى كل اللحظات

فلقد توجتك ملكاً على عرش المحبين
ولقبتك بأمير العشاق

الأربعاء، 28 يناير 2009

تحياتى لكم

النهاردة حبيت أعمل إمتداد للبوست ال فات
لأنى حسيت من تعليقات أغلب المدونين من الجيل الجديد
إنهم عندهم خلفية عن عدد محدود من الأغانى القديمة
وحسيت إن واجب عليا بصفتى من جيل الوسط
إنى أسمعكم جزء بسيط من التراث القديم ال مايتعوضش

وهأسمعكم رائعة من روائع فايزة أحمد
كانت بتخطف قلبى وتنقلنى لدنيا تانية

أغنية ليه يا قلبى ليه



والأغنية التانية لصوت الشجن نجاة الصغيرة
كنت ولازلت بأبكى بجد لما بأسمعها

أغنية أنا بأعشق البحر



ويارب الأغانى تعجبكم

تحياتى لكم وللزمن الجميل

الجمعة، 16 يناير 2009

ألوان × ألوان











لو كنت بتسمع أغانى قديمة أو شفت أغنية قديمة
( أبيض وإسود مش ألوان )
ياترى بتحس ساعتها بإيييه؟
لما تسمع نجاة بتغنى أو فيروز أو أم كلثوم
(مع حفظ الألقاب )
بتكون حالتك إيه ؟
لو عادى مش فارقين معاك يبقى انت أكيد أكيد فى مصر
ولو بكيت من شجن وجمال وحلاوة ورقة غناهم
وحسيت بحاجة غريبة بتحصل جواك
تبقى حاجة من الأتنين :
يا متغرب عن بلدك وأغانيهم بتصبرك
يا إما بتتحسر على الزمن ال راح وأخد الأصالة معاه
لو شفت أغانى دلوقت هتلاقى فجوة كبييرة جداً
مع إن فرق السنين مش كبير قوى
لكن التغير رهيب والنتيجة بعد المشاهدة
إكتئاب حاد أو هلاوس بصرية أوتلوث سمعى ونفسى
كل شىء إتغير دلوقت وبقى بالألوان
مش الأغانى بس ال بقت ألوان
لكن معادن الناس والمبادىء والقيم والأخلاق والعادات والتقاليد
كلها بقت ألوان × ألوان
زمن الأبيض والأسود راح وراحت معاه حاجات كتيييير
ياريت كان الزمان يفضل من غير ألوان
أكيد كانت حياتنا هتختلف كتيييرعن دلوقت