الخميس، 12 أغسطس 2010

هنفطر فين النهاردة ؟؟


النهاردة انا راجعة من الشغل تعبانة وهلكانة والدنيا حر مووووت
من الآخر كدة مش قادرة أعمل أكل عشان الفطار
أعمل ايه ؟ أعمل أيه ؟ اعمل ايييييييه ؟
ايوة هوه ده الحل التمام
أروح أكبس على ماما و بابا و أنزل عليهم زى البراشوت و أفطر عندهم


إتصال تيليفونى : ترن ترن ، ترن ترن ، ترن ترن
ماما : ألو
أنا : أيوه يا ماما إزيك ..... أخبارك ايه ؟ وحشتينى
ماما : و انتى كمان
أنا : بأقولك ايه يا ماما مدام وحشتك بقى أنا جاية أفطر معاكى النهاردة
ماما : ياريت كان ينفع والله يابنتى بس إحنا معزومين النهارد برة تبع الشغل ونازلين دلوقت ،......
خليها بكرة أحسن سلام .
أنا : سلام .
بكرة ؟ هأفضل صايمة لحد بكرة ؟؟؟
أعمل ايه ؟؟؟ اعمل أيه ؟؟؟
أيوه .......... أختى حبيبتى

إتصال تيليفونى(2) : ترن ترن ، ترن ترن ، ترن ترن
أختى : ألو
أنا : أيوة ازيك يا أختى
أختى : أهلاً أهلاً عاملة ايه ؟
أنا : كله تمام ، بأقولك ايه
كنت بأفكر آجى أفطر عندك النهاردة أصلك وحشانى قوى
أختى : أخ ... النهاردة ؟ مممممم ماشى تعالى
أنا : ايه مافيش أكل عندكم النهاردة وله اية ؟
أختى : لأ عندى بس أنا هأرجع من الشغل متأخر
وعشان كدة هنأكل سمك جاهز من بره وخلاص
أنا : ايه سمك ؟؟!!!!
سمك فى رمضان ؟؟؟
حرام عليكى يا شيخة هوة الواحد ناقص عطش !!!!

أختى : خلاص بلاش النهاردة ممكن تيجى بكرة
أنا : بكرة ؟؟ تانى بكرة ؟؟؟
طيب لما أشوف سلام

ييييه وبعدين.... أعمل ايه ؟؟؟ .....
أيوة وجدتها .... خالتى

إتصال تيليفونى(3) : ترن ترن ، ترن ترن ، ترن ترن
خالتى : ألو السلام عليكم
أنا : وعليكم السلام إزيك يا خالتى
خالتى : مين بيتكلم ؟؟
أنا : أنا بنت أختك يا خالتى نسيتينى وله اية ؟
خالتى : لأ إزاى .... إزيك يابنتى
أنا : كويسة إنتى عامله ايه وحشانى
خالتى : والله أنا مش كويسة
أنا : ليه كدة بس فيه ايه ؟
خالتى : انا تعبانة بقالى يومين عندى أنفلونزا
أنا : ياخبر ألف سلامة عليكى
خالتى : الله يسلمك متشكريين على سؤالك
أنا : العفو يا خالتى إحنا ال متشكرين على البمبة
أأأأأ قصدى متأثرين بمرضك قوى سلام بقى

ايه الحظ النحس دة أعمل ايه ؟؟؟؟؟
أيوة أكيد عمتى فاضية النهاردة

إتصال تيليفونى(4) : ترن ترن ، ترن ترن ، ترن ترن
عمتى : سلامو عليكم
أنا : وعليكم السلام إزيك ياعمتى
عمتى : أزيك أخبارك ايه ؟
أنا : عاملة ايه شكلك مشغولة فى تحضير الفطار صح ؟
عمتى : لأ والله يابنتى دة أنا قاعدة فاضية من الصبح
أنا : يااااه أكيد بقى خلصتى الأكل من بدرى ،
طيب مدام انتى فاضية آجى أقعد معاكى نتسلى وبالمرة نفطر س
وا
عمتى : كان على عينى والله يا بنت أخويا بسسسسس .......
أنا : بس اية ياعمتى خير ؟؟؟؟
عمتى : أصل المية مقطوعة من الصبح ومش عارفة أعمل حاجة خالص
خليها بكرة أحسن تكون الميه جت
أنا : ماشى ياعمتى مع السلامة
بكرة ؟؟؟ هوة اية مشكلة بكرة معاهم بالظبط ؟؟؟
يكون فية عيد أو موسم بكرة وأنا ما أعرفش ؟
أعمل ايه ؟؟؟؟ اعمل اييبيية ؟؟؟؟
أيوه الحل أكييييد ...... عند حماتى
ألحق أكلمها مش فاضل وقت كتيير على الفطار


إتصال تيليفونى(5) : ترن ترن ، ترن ترن ، ترن ترن
حماتى : ألو .... ألو
أنا : أزيك يا تنط
حماتى : مين بيتكلم ؟
أنا : أنا مرات إبنك
حماتى : أهلاً إزيك يا حبيبتى
أنا : كويسة أيه الهيصة ال عندك دى يا تنط ؟
حماتى : أصل أنا بأبيض الشقة
أنا : حد بيبيض فى رمضان ؟؟!!!!!
حماتى : أصل الصنايعيه كانوا متفقين معانا يخلصوا قبل رمضان
و طبعاً ما إلتزموش بالميعاد
أنا : ماشى ربنا يعينك سلام يا حماتى

خلاص كل الناس النهاردة مش فاضية يا إما عندهم ظروف ؟؟؟
اية النحس دة ..... ،
ياخبر فاضل ربع ساعة على الآذان أعمل ايه ؟؟؟
أروح فين ؟
أيوة ... وجدتها ..... و جدتها
مافيش غير حل سحرى واحد ومش ممكن يكون عندة ظروف أو مشكلة ..

وأخيراً ......... وبعد تردد
إتنكرت وإتخفيت ولبست نظارة شمس
و نزلت أفطر فى مائدة الرحمّن ال على ناصية الشارع
و رمضان كريم



هناك 10 تعليقات:

فشكووول يقول...

السلام عليكم
والله انت اتهريتى فصول من حكاية الفطار والاخر تيجى على مائدة الرحمن
والله فكره ما كانتش خاطره على بالى .. بس على فكره لو اتصلتى بى كان ممكن اعزمك على الفطار عندى بس مش عارف كان يوم ايه لكن اذا كان اليوم اللى فيه بنتى وولادها وابنى وولاده والشقه بتبقى مليانه على آخرها كنت ح اقولك خليها بكره وكانت تبقى اكمال لمأساة افطارك..

كل سنه وانت طيبه
رمضان كريم

Tarkieb يقول...

ههههههه يعنى بكرة مممكن تتعزمي للصبح.....رمضان كريم وشهية طيبه ...

الازهرى يقول...

لالالالالالالالا
دا تزويغ واقتباس من رمضان اللى فات وانا كقارئ قديم ومن أصحاب المدونة الشرفيين
لن أقبل

ينزل واحد جديد حالا والا..........

كل سنة وانت وككل أحبابك فى خير وسلام وعافية وأمن وأمان
وسلاما لشيكابالالا العزيز

اعشق فى الليل ضوء القمر يقول...

مع الازهرى قراته السنه اللى فاتت
لكن لو لازمه لكل رمضان احيكى عليها

كل سنه و انت طيبه لكن بوست حوار مع انا بعد ما نزلت مسحته فى وقته لأسباب خاصه يعنى مفيش مشكله بس مش عارف انتم شايفينوه إزاى
تقبلى افضل امانى

رمضان كريم

اقصوصه يقول...

رمضان كريم

وكل عام وانتم بخير :)

يا مراكبي يقول...

أيوه عارفها أنا مائدة الرحمن بتاعة كل سنة دي

شكلها كده هنقضي عليها كل أيام رمضان أسهل

:-))

فكرة من الزمن ده يقول...

هههههههههههه
يابنتي كنتي وفرتي تمن المكالمات ووقتها
وعملتي بيض بالسطرمة وفول ورحمتي نفسك
كل سنة وانتي طيبة

الازهرى يقول...

انت صدقتى التهديد وجريتى والا ايه ؟

Kiara يقول...

عامله ايه وحشاني

كل سنة وانتي طيبة ياقمر

richardCatheart يقول...

كل سنه وانت طيبه يا صدى يعود عليكى وعلى الاسره بالف خير يارب