الفن الحقيقى

تحية لزمن الفن الجميل
والجيل المبدع
إل مش هيتكرر
ومش هيتعوض
وإل أنا بجد بأمووووووت فيهم

ولكم تحياتى

حاجة مش معقولة

لأ .. لأ ..لأ يا جماعة
ماتحاولوش تأثروا عليا

لأ .. لأ ..
أنا قلت مش هأنشر بوست فى شم النسيم
يعنى مش هأنشر بوست

خلاص الموضوع دة إنتهى ومافيهوش نقاش
بصراحة أنا مش فاضية خااااااالص

يعنى بزمتكم مين هيلون البيض بالروعة والجمال دة ؟

مافيش فنانة غيرى طبعاً

!!!!!!!

وبعدين يعنى مين هينظف الفسيخ والرنجة ؟

العمل الجبار العظيم دة محتاج واحد محترف

( إل هوه أنا برضة )

لأ ... لأ بجد ماتتحايلوش عليا أكتر من كدة
أنا مابتنفعش معايا الطريقة دى

يعنى أسيب تقطيع البصل و أروح أنشر بوست ؟ ؟

مش معقول خالص

وبعدين أنا لسة ماعملتش كمان الترمس والحمص

خلاص ياجماعة لوسمحتم ما تضغطوش عليا

أنا قررت إنى مش هأنشر بوست

وأنا كلمتى ماتنزلش الأرض أبداً

أروح بقى أخلص إل ورايا
وكل سنة وإنتم طيبين

ضع الكوب وإرتاح قليلاً

في يوم من الأيام كان محاضر يلقي محاضرة عن التحكم بضغوط وأعباء الحياة لطلابه
فرفع كوباً من الماء وسأل المستمعين :

ما هو في اعتقادكم وزن هذا الكوب من الماء؟
وتراوحت الإجابات بين 50 جم إلى 500 جم

فأجاب المحاضر:

لا يهم الوزن المطلق لهذا الكوب ، فالوزن هنا يعتمد على المدة التي أظل ممسكاً فيها هذا الكوب

فلو رفعته لمدة دقيقة لن يحدث شيء ولو حملته لمدة ساعة فسأشعر بألم في يدي،

ولكن لو حملته لمدة يوم فستستدعون سيارة إسعاف.

الكوب له نفس الوزن تماماً، ولكن كلما طالت مدة حملي له كلما زاد وزنه.

ومن هنا أستنتج الآتى :
لو حملنا مشاكلنا وأعباء حياتنا في جميع الأوقات

فسيأتي الوقت الذي لن نستطيع فيه المواصلة،

فالأعباء سيتزايد ثقلها. فما يجب علينا فعله

هو أن نضع الكوب ونرتاح قليلا قبل أن نرفعه مرة أخرى.
فيجب علينا أن نضع أعباءنا بين الحين والآخر

لنتمكن من إعادة النشاط ومواصلة حملها مرة أخرى.

فعندما تعود من العمل يجب أن تضع أعباء ومشاكل العمل ولا تأخذها معك إلى البيت،

لأنها ستكون بانتظارك غداً وتستطيع حملها.

-----------------------------------

هذة القصة منقولة عن إيميلى

بعثها لى أخويا المراكبى

ونشرتها النهاردة مخصوص

عشان حبيت أقوله

كل سنة وإنت طيب يا حبيبى وعقبال 100 سنة

happy birth day to hamada

هدية صغيرة

هدية صغيرة ومش قد المقام

لكل أم تعبت وسهرت وربت
قـلـقـت إستحملت وضحـت
لكل أم شقـيـت وصبـرت

ولكل روح أم طاهرة
فى كل مكان فى العالم

بأهديهم قصيدة
للشاعر :
محمود سلطان المراكبى

يمكن نقدر نوفيهم حاجة صغيرة من حقهم علينا

من نبضةِ القلبِ من أعماق وجداني
أهبتُ بالشعرِ أن .... هيا , فلبّاني

في عيدِ أُمي , وفي آفاق روضتها
صدحت علّي أوفي بعضَ عرفاني

رأيتُ في عيدها الدنيا يجملها
فصلُ الربيعُ فجاءت عطر ريحان

لو أن حادثةٌ باتت تؤرقني
لبات طرفك مُضنى غير وسنان

أو أن هماً عميقاً بات يُثقلني
حملتِ عني أشجاني وأحزانى

أُماه , لستُ أوفي بعض مكرمة
ولو أفضت بإطراء وشُكران

أُماه , أنت حياتي , أنت منبعها
لولاك ما كنتُ في الدنيا بإنسان

حملتني بجوار القلب حانية
وصُنتِني في حنانٍ بين أحضان

عاوزين نخلص من اليوم دة

أزيكم أخباركم إيه مع أيام الإسبوع ؟
فاكرين لما قررت ألغى يوم الجمعة

وسميناه ملحق الخميس الإسبوعى ؟؟

(راجع بوست نتيجة الأنتخة )

الحقيقة حصل عليّا هجوم شامل
وإتصالات مكثفة ترفض الحدث

وغضب شديد وتنديد وشجب
من عدد كبير من أصدقاء المدونة

ولأن مدونتى تتمتع بالديموقراطية
فعملت إجتماع قمة مع نفسى وقررنا ( أنا ونفسى )
إننا نرجع يوم الجمعة مكانه حقناً للدماء

------ (دمائى أنا طبعاً )

ونلغى يوم الثلاثاء فقط وطبعاً أنا شفت وسمعت
ترحيب وتصفيق حاد من أغلب المدونين بالفكرة دى

غريبة !! مش عارفة يوم الثلاثاء عامل للناس إيه ؟
مافيش حد عاوزة ومافيش حد إعترض بل بالعكس
أغلب الناس إنبسطت من فكرة إلغاؤه من أيام الإسبوع

يكونش قتل قتيل وله يكون إرهابى وله حاجة ؟؟؟؟

الحقيقة أنا كنت ناوية أخصصلة بوست
عشان أشرح أسبابى فى إلغاؤه من أيام الإسبوع
لكن لقيتة مش مستحمل ياعينى إنى أقطّع فى فروتة
وكفاية إل شافه وسمعه (ربنا يعينه)

أنا شايفة إنه هيلم شنطتة من سكات
وهينسحب من موقعة فى هدوء

--------------------
وفى الحالة دى
بعد رجوع يوم الجمعة وإنسحاب يوم الثلاثاء
قررنا ( أنا ونفسى طبعا ً) الآتى :
1- تقديم يوم الأربعاء ليحل محل الثلاثاء .

2- تقديم يوم الخميس ليحل محل الأربعاء .

3- تقديم ملحق الخميس الإسبوعى ليحل محل الخميس .

4- تثبيت يوم الجمعة وإعادتة لموقعة القديم .
ليصبح الإسبوع (من الآخر كدة):
السبت ، الأحد ، الإثنين ، الأربعاء ،
الخميس ، ملحق الخميس ، الجمعة .

5- تطبيق وتنفيذ هذة المذكرة إعتباراً من تاريخ صدورها .

6- يتم نشر تنوية فى جميع وسائل الإعلام لمنع حدوث

بلبلة وتضارب فى خط سير العمل و الإنتاج .

7- تعيين حراسة على يوم الثلاثاء إلى أن يتم
إلحاقة بمتحف الفن المصرى القديم تخليداً لذكراه .

--------------------------------
إنتهى البيان

ربنا يستر

أولاً : مش عارفة أقول اية ؟؟؟
البوست إل فات جالى كمية حسد ونم وقر كبييير جدااااً

(كل واحد حسد طبعاً عارف نفسة)

والحمد لله الكمبيوتر ما إستحملش وإتعطل

ودة كان سبب تأخيرى فى نشر أى بوست تانى

وعاوزة أقول ياجماعة إن البوست إل فات دة

كان غلطة مش هتتكرر

وكان بمثابة

(جامدة بمثابة دى )

هُدنَة بمناسبة عيد الحب

وتوبة إن كنت أنشر بوست عن الحب تانى

وربنا يستر على باقى الشقة وتفضل سليمة

**************************

ثانياً : كان لازم أقول سامحينى وماتزعليش
لمها زين صاحبة مدونة (إنها الحياة )
لأنى إتأخرت كتييير قوى فى نشر التاج بتاعها
بس الظروف والأحداث كانت أقوى مننا جميعاً فى الفترة الأخيرة
وكمان التاج دة دسم جداً وفية أسئلة صعبة
وبأحب بجد أشكرها جداً جداً على هديتها

بسم الله الرحمن الرحيم (نبدأ)
1- لو كان ينفع تختار عصر تعيش فيه هيبقى انهى؟ ومين الحاكم؟
كان نفسى قوى أعيش فى عصر الفراعنة وأكون طبعاً من طبقة الحكام عشان أجهز لنفسى مقبرة فرعونية مليئة بكل خيرات وكنوز الأرض وتتنحت تماثيلى فى كل مكان
وكمان عشان أعرف سر التحنيط وبناء الهرم ولعنة الفراعنة

* طبعاً كنت عاوزة أعيش فى عهد رمسيس التانى

وياسلام لو يسعدنى الحظ وأكون أختة مثلاً

.2- إيه اكتر حاجه بتحبها فى رمضان؟
بحب الطقوس والروحانيات والبركة والتدين ال بيسيطروا على أغلب الناس فى شهر رمضان

3- اوصف أجمل فطار ممكن تفطره؟
أساسى لازم يكون موجود شوربة ساعت الفطار
وياسلام لو محشى ورق عنب أو كرنب وبطة محمرة
نبقى متشكرين ليكم وكدة تمام قوى

4- لو انت حاكم هتكون عادل ؟ وهتعرف ازاى ؟
بمنتهى الصراحة :
لأ طبعاً مش ممكن أقدر أكون حاكم عادل
لأن عددكم كتر قوى قوى قوى
وإستهبلتم فيها على الآخر
هوة أنا هألاحق على مين وله مين وله مين ؟؟
ربنا يتولاكم بقى برحمتة

.5- مين أكتر اعلامى بتحبه؟
حمدى قنديل - منى الشاذلى

6- لو ممكن شغلانه تانيه تختار ايه؟
لو مجبرة أشتغل مش هأختار غير تخصصى لأنى بأعشقة
ولو هأغير تخصصى أحب قوى
أقعد أربى العيال وأأنتخ فى البيت

.7- تانى بلد تحب تعيش فيه بعد مصر ؟
كندا - فرنسا

.8- اوصف ترتيبات أجمل فرح ممكن تحضره؟
أجمل فرح من وجهة نظرى لما بيكون المعازيم فرحانين للعرسان من قلبهم ومش جايين يأكلوا ويطلعوا القطط الفطسانة فى العرسان
لكن جايين يفرحوا معاهم من قلبهم

9- بتراعى كلام الناس والقيل والقال؟ وليه؟
أكيد طبعاً إحنا مش عايشين فى صحراء ورأى الناس مهم وخصوصاً لما بيكونوا قريبين منك ويهمهم إنك تتغير للأحسن

10-صحيت من النوم لا موبايل ولا كمبيوتر ولا كاميرا ديجيتال ورجعنا لعصر الحصنه والحمام الزاجل؟
ياسلالالالالالام أحلى حاجة والله إن الواحد يريح دماغة شوية من التكنولوجيا ال هرشت دماغنا وبعدتنا عن بعض
بس موضوع الحصنة والحمام الزاجل دة صعب قوى لأن ال ممكن يوصل فى أقل من الثانية هيوصل فى شهر وطبعاً ممكن فى الشهر دة تحصل تغيرات كتيرة قوى للأسواء لو الخبر أو الإنسان ماوصلش فى الوقت المناسب

11-لما بتحب تهرب من كل حاجه بتروح فين ؟
لو أمكن أروح مكان بعيد مافيهوش حد وقدامى بحر واسع فاضى
لو ما أمكنش بأقفل عليا غرفتى وأقعد على السرير وأضلمها خالص

.12-امتى أول مره أخدت فيها نفس وقلت ياااااااه أنا كبرت؟
لما أمى إتوفت حسيت فجأة إنى كبرت أو انى لازم اتصرف زى الكبار رغم صغر سنى

.13-بتشرب سجاير ولا لا؟ وايه رأيك فى الرجاله والستات اللى بتشرب؟
أنا طبعاً ما بأشربش السجاير ومابأطيقش ريحتها
أما رأيى فى الناس ال بتشربها
مش هأقدرأقولة وأحب أحتفظ بيه لنفسى
حقناً للدماء

.14- بتعرف ايدك الشمال ازاى؟
بأعرفها لأنى بأعمل بيها كل حاجة
لأنى ( شوله)

.15- اكتر اله موسيقيه بتحبها؟
الجيتار والكمان

.16- ليه الذوق والنخوه اتعدموا؟
لان فيه حاجات كتيير قوى إتغيرت والمقاييس والمعايير إختلت فى الزمن دة
والذوق والنخوة أصبحت أشياء يُلام عليها الفرد إذا فعلها

.17- ايه الحاجه اللى لو حصلت هتبقى سعيد ؟
إن أشوف بنتى وجوزى أحسن ناس فى الدنيا

18- تحب أرض زراعيه ولا اجنس عربيات ولا كام عماره ولا فلوس فى البنك؟
فلوس فى البنك
.19- تحب؟ البحر ولا النيل؟
بأحب البحر قوى فى النهار
وبأخاف من منظرة هوة والنيل بالليل
مركب ولا طياره؟
طيارة
.شخص مجنون ولا عاقل؟
عاقل فى امور الحياة اليومية
مجنون فى الحب
.تقرا كتاب ولا تتفرج على فيلم ؟
كتاب طبعاً

التاج لمين؟
طبعاً أولاً : أهدية لجوزى شيكابالا
وثانياً : السؤال دة إجابتة مشكلة كبيرة
لأن فية ناس كتير بتتضرر من إهداء التاج ليها
وفيه ناس موصيانى إنى ما أهديهولهاش
بصراحة مش عارفة أعمل ايه ؟؟
وعشان كدة قررت أهدية لكل المدونين
ال أنا ضايفاهم عندى فى الشمال
وكمان ال ضايفاهم فى اللآخر تحت
أنا كدة عدانى العيب كلكم معزومين علية
وال يعجبة ويحب يجاوب عليه يجاوب
بس خلاص
تحياتى

لأنك معى

لأنك معى

لأنك متواجد داخل أنسجتى
تحتل شراينى

منتشر فى أجزائى
تتمدد فى كيانى

لأنك تحيا فى قلبى
وتأسر عالم أحلامى

لأنك أنت رسول الحب
ونبض القلب
وعشق العمر

لأنك لا تغيب رغم المسافات
ولا تهون رغم الصعوبات
ولا تنسى أجمل الذكريات

لأنك معى فى كل اللحظات

فلقد توجتك ملكاً على عرش المحبين
ولقبتك بأمير العشاق

تحياتى لكم

النهاردة حبيت أعمل إمتداد للبوست ال فات
لأنى حسيت من تعليقات أغلب المدونين من الجيل الجديد
إنهم عندهم خلفية عن عدد محدود من الأغانى القديمة
وحسيت إن واجب عليا بصفتى من جيل الوسط
إنى أسمعكم جزء بسيط من التراث القديم ال مايتعوضش

وهأسمعكم رائعة من روائع فايزة أحمد
كانت بتخطف قلبى وتنقلنى لدنيا تانية

أغنية ليه يا قلبى ليه



والأغنية التانية لصوت الشجن نجاة الصغيرة
كنت ولازلت بأبكى بجد لما بأسمعها

أغنية أنا بأعشق البحر



ويارب الأغانى تعجبكم

تحياتى لكم وللزمن الجميل

ألوان × ألوان

لو كنت بتسمع أغانى قديمة أو شفت أغنية قديمة

( أبيض وإسود مش ألوان )
ياترى بتحس ساعتها بإيييه؟
لما تسمع نجاة بتغنى أو فيروز أو أم كلثوم

(مع حفظ الألقاب )
بتكون حالتك إيه ؟
لو عادى مش فارقين معاك يبقى انت أكيد أكيد فى مصر
ولو بكيت من شجن وجمال وحلاوة ورقة غناهم
وحسيت بحاجة غريبة بتحصل جواك
تبقى حاجة من الأتنين :
يا متغرب عن بلدك وأغانيهم بتصبرك
يا إما بتتحسر على الزمن ال راح وأخد الأصالة معاه
لو شفت أغانى دلوقت هتلاقى فجوة كبييرة جداً
مع إن فرق السنين مش كبير قوى
لكن التغير رهيب والنتيجة بعد المشاهدة
إكتئاب حاد أو هلاوس بصرية أوتلوث سمعى ونفسى
كل شىء إتغير دلوقت وبقى بالألوان
مش الأغانى بس ال بقت ألوان
لكن معادن الناس والمبادىء والقيم والأخلاق والعادات والتقاليد
كلها بقت ألوان × ألوان
زمن الأبيض والأسود راح وراحت معاه حاجات كتيييير
ياريت كان الزمان يفضل من غير ألوان
أكيد كانت حياتنا هتختلف كتيييرعن دلوقت

خلاص آخر يوم

النهاردة نهاية سنة فاتت وخلصت بكل أحداثها
وبكرة أو بعد ساعات بداية سنة جديدة الله أعلم بيها

والسؤال هنا بيفرض نفسة والسؤال هوه :
ياترى لما بتصحى يوم 1 يناير بتحس بإية ؟
بعنى اية الفرق بالنسبالك بين
يوم 31 ديسمبر و يوم 1 يناير ؟
* ياترى بيمثلك اية يوم 1 يناير ؟
* بيعدى زى أى يوم قبلة ؟
* بيفرق معاك كتير ؟
* بتستناة كل سنة وبتهتم وتحتفل بية؟
* مابتاخدش بالك ان السنة الجديدة بدأت ؟
* بتنوى تغير حاجات كتير فى حياتك ؟
* ولة مافيش فرق كلة محصل بعضة ؟
الشغل هوة هوة والناس هية هية والدنيا مابتتغيرش كتير
إمبارح زى أول إمبارح زى بكرة و زى بعد بكرة ؟؟
يهمنى أعرف يوم 1 يناير بيكون مكانة فين فى حياة كل واحد فيكم

وفى النهاية .......
أتمنى لكم عام ممتلىء بالأحداث السعيدة والمشاريع الناجحة
وتحقيق الأمانى والأهداف الهامة فى مستقبلكم
ومستقبل من يهمكم أيضاً
( واخدين بالكم من الحتة الأخيرة دى )
سلام

الله فوق الجميع

****

مش لاقية كلام أقولة

مش قادرة أعبر بشىء

حسبى الله ونعم الوكيل

الله أكبر من أى حدث

الله فوق جميع البشر

أقرأوا معى الفاتحة للشهداء أجمعين
وذلك أضعف الإيمان

أسئلة حائرة

في داخلي أحمل هموماً ثقيلة

وتتناثر أحاسيس متضاربة ,

في داخلي تتبعثر كلمات كثيرة ....
ونهر طويل من المشاعر المتداخلة

في داخلي بئرٌ عميقٌ من الأحزان ,
وفيضان حب جارف ليس له عنوان

هل تستطيع الشمس أن تأبى يوماً فلا تسطع ؟؟
كذلك عمري إن مر يوماً في غيابك ,

هل يمكن للأرض أن تكف يوماً عن الدوران ؟
كذلك قلبي إن عاش يوماً دون حبك ,

هل إستطاع الكون أن يختل في لحظة ؟
كذلك نبضي إن عجز أن يهتف يوماُ بإسمك

وهل تتساقط الأمطار حقاً من جدران المنازل ؟
كذلك أرى عندما تحرمني من رؤياك ,

هل تصرخ النجوم ويواسيها القمر ؟
كذلك أسمع دوماً عندما أتلهف لقائك ,

هل تتصارع الساعات والدقائق أحياناً ؟
كذلك أرجو عندما أشعر بالوحشة في غيابك

وهل يمتلىء الوجود عطوراً و أزهاراً وأفراح ؟
كذلك يكون عندما تسـعـدني بعـودتك

بعد العيد

*

أأأأأأأأه يا بطنى

بطنى هتنفجر ....

أنا جاتنى تخمة مركبة
وعندى أنتفاخ وسوء هضم
وتضخم فى المعدة
وإنبعاج فى القولون
وصراخ فى الأمعاء الدقيقة والغليظة
ومظاهرة عاملاها بقية أعضاء الجسم
كتبوا فيها .......

نشيد العيد الكبير :
يا ريتنى ماشفت اللحمة ولا أكلتها
يا ريتى ما تبلتها وظبتها
يا ريتنى ماشويتها ولا سلقتها
يا ريتى ماكنت خرجت من عتبة بيتنا ولا عتبتها
كل ما أزور واحدة تحلف وتتقطع عشان أدوق أكلها
هية الواحدة ليها كام بطن عشان تتحمل أكل ضعف وزنها ؟
كنتم فين أيام رمضان ؟
يا ما أكلنا فى موائد الرحمن
وما فيش واحدة عزمتنى عندها !!!
والله خايفة أبص فى المرايا
ألاقينى شبة الخرفان من كتر أكل لحمها
كل سنة وانتم طيبين
خلاص

أنا هأصوم عن اللحمة
ومش عاوزة حد يجيب سيرتها
ولا يقول إسمها

فى العيد جاتنى هدية

كل سنة وانتم طيبين

أنا كنت محضرة بوست هأنشرة بعد العيد

لكن فجأة جاتنى هيدية فى أول يوم العيد

من (مواطن مصرى نايم)
وطبعاً أنا بأشكرة جداً جداً

والهدية هية تاج
ولأنة بمناسبة العيد وماينفعش يتأجل
قررت أنشرة النهاردة
،

ماذا يمثل لك العيد؟ وما أكثر شىء يبهجك فى مظاهر العيد؟

العيد يمثل لى الفرحة والبهجة والخير والتراحم

أكثر مايبهجنى التجمع حول شىء واحد والإتفاق على هدف واحد فى نفس الوقت من كل عام
************************************
أوصف لنا طقوسك فى العيد من ليلة العيد لآخر يوم ؟
ياااااااه كدة القاعدة هتطول قوى لأن الطقوس كتيرة
ومش عارفة أوصف الطقوس قبل الجواز ولة بعدة ؟؟
أكيد مختلفة
**********************************
إحكى لنا أطرف موقف حصلك فى العيد ؟

رحت أزور ناس قرايبنا وكان مشوارهم طويل قوى وبعد ماوصلت

إكتشفت إنهم قرروا يزورونا فى نفس الوقت

ومالاقوناش فى بيتنا ( القلوب عند بعضها )
*********************************

بتحرص على تهنئة الأهل والأقارب والأصدقاء ولا مش بتهتم؟

أكيد أهم حاجة فى العيد إنك تهنىء كل الأهل والأصحاب لأن دة بيدخل الفرحة فى قلوبهم
************************************
مين أول حد تزورة أو تكلمة عشان تهنيه بالعيد ؟

أول حد أحب أزورة والدى ووالدتى
وأول حد أحب أكلمة والد ووالدة زوجى
ماتفهمونيش غلط أهل زوجى ساكنين بعيد
ربنا يخليهم ويحفظهم جميعاُ
********************************
ايه الفرق بين العيد الحالى والعيد أيام الطفولة ؟
الفرق إن الواحد كان بيستمتع وبيفرح وبس
من غير مايكون شايل هموم أو مسؤلية فى أى حاجة
*********************************
كلمنا عن ذكرياتك فى العيد ؟
أحلى ذكريات العيد ركوب العجل والمراجيح والبمب والصواريخ واللبس الجديد واللعب لغاية ما نتهد
**********************************
تفتكر الحياة من غير عيد هتفرق كتير ؟
هتفرق كتييييييييييير قوى
للأسوأ طبعاً
*********************************
اية أجمل رسالة تهنئة بالعيد وصلتك ؟ ومن مين ؟
أبخل 3 :
من يلبس قديم ولديه جديد ،
من يجوع نفسة وطعامة يزيد ،
ومن لايهنـئنى بالعيد ولديه رصيد
بعتهالى أخى المراكبى
*****************************
لسة بتاخد عيدية ؟ من مين ؟ وبتديها لمين ؟
بأخد عيدية من الحكومة ( مكافأة العيد )
وبأديها لبنتى وأولاد أخويا وأولاد أختى
وأى طفل فى العيلة صغير أقابلة فى العيد لازم أديلة عيدية
(مش بأفشر والله)
******************************
اية رأيك فى التاج ؟
جميل جداً رجعنا لذكريات حلوة قوى
*****************************
تحب تمرره لمين ؟ أذكر10على الأقل
زوجى الحبيب (زمن الشيكابلا)
أخى المغترب (المراكبى)
أختى العزيزة (دردشة على الماشى)
ريم أو مرمر الكبيرة (إسم مدونتك كبير قوى)
صديقتى الغالية (الملاك الحزين)
حبيبتى شيماء على (قهوة بالفانيليا)
إسراء الجميلة (أحيانا وأحيانا)
هنودة (غربة)
صباح الصباح
لماضة
كوشيا (قصاقيص)
د.عمرو(كلام من القلب)
شفقة هانم وإحسان بيه
طهقانة (مع انى عارفة انها مابتحبش التاج )
الأزهرى (ذكريات)
متهيألى كدة كفاية أكتر من عشرة أهم
سلام بقى

نتيجة الأنتخة

طبعاً بعد كل أصحابى وحبايبى ما جربوا خطة الأنتخة

(بتاعت يوم الخميس)

أحب أعترفلكم بسر خطيييير وهوه :

أن أنا بمناسبة الأوكازيون عملت خصم 30% على أيام الإسبوع
وقررت إلغاء يوم الجمعة ويوم الثلاثاء
وكفاية علينا 5 أيام فى الإسبوع
وطبعاً عندى أسبابى :

قررت ألغى يوم الجمعة لأن بعد أنتخة يوم الخميس والرحرحة والإسترخاء التاااام

هتصحى أصلاً بعد العصر أو قبل المغرب بشوية
وهتكون طبعاً مش مركز و مدروخ وجسمك مدغدغ من كتر الأنتخة
ومش هتعرف الفرق بين الكوسة والمسقعة

وهتفتكرهم همة الأتنين كيكة
وفى الآخر هتسخنها فى الفيديو بدل الفرن (عادى طبعاً)

وعشان نحافظ على كرامة الكيكة
أأأ قصدى عشان نحافظ على آدمية الكيكة
ييييييي ووووووووه
معلش أنا مش مركزة أصلى كنت مأنتخة إمبارح

أقصد عشان نحافظ على صحتنا وف نفس الوقت مانتحرمش من الأنتخة
قررت ألغى يوم الجمعة لأنة كدة كدة ضايع ومش مستفيدين بية

وعشان الدنيا ماتتلخبطش هأخلية موجود فى مكانة وترتيبة الإسبوعى
لكن هأختار لة إسم تانى

هأسمية : سـامـيـة !!!!

لأ لأ لأ لأ... وبعدين أنا بأهنج كدة لية ؟؟

هأسمية : وائـل عشان ولد !!!!

يا اااااااااااا ه
انا آسفة معلش هأركز وأفتكر أهو
أيوة أيوة ........ هأسمية … هأسمية :

ملحق الخميس الإسبوعى

شوفوا حتى الإسم لذيذ ولطيف وجميل ازاى ؟
تحس كدة انة متناسق مع أنتخة الخميس

مش كدة ولة اية ؟

أما بقى يوم الثلاثاء فهيكون له قاعدة على رواقة
عشان أحدد خطتة المستقبلية
ومصيرة المحتوم
سلام

رجعنا تانى

رجعنا تانى ليوم الخميس وجماله و فوايدة
وأحلى حاجة فى يوم الخميس أيييه ؟
( أنه بعدة أجازة )؟؟

طبعاً أكيييييييد
بس الأحلى من كدة ايه ؟؟؟؟؟

الأحلى إزاى نحس أن دة يوم الخميس
هأقولكم و الأجر والثواب عند الله

تقعد مأنتخ قدام التيليفزيون و قدامك كيس شيبسى عائلى
أو طبق فشار محترم
وممكن لب وسودانى ولتر بيبسى
وطبعاً مش مركز الtv بيعرض إيه
المهم إنك مش مستعد تقوم من مكانك
حتى لو باعولك الهرم

مزمز و قزقز بقى و إشرب البيبسي بمزاج
ياسلام ..... ايه الجمال والمتعة دى

وبعد شوية تلاقى نفسك موخم على الآخر
وجسمك همدان و عاوز تنام
آآآه .... بس النوم يوم الخميس لية شروط
مـش أى نــوم و الـسـلام

وإليكم الشروط :
1- تقفل موبايلاك .
2- تقفل شباك الغرفة (تضلمها يعنى ) .
3- تشيل فيشة تيليفون البيت .
4- تقفل باب غرفتك عليك .
5- تحط المنبة فى التلاجة (مثلاً)
6- تشغل التكييف لو الجو حر) و الدفاية ( لو برد ) .
7- تحط جنبك زجاجة مياة (عشان تشرب وإنت مأنتخ ) .
8- تشغل موسيقى هادية قبل النوم (عشان ماتحلمش بكوابيس ) .
9- ماتفكرش فى أى مشاكل أو خطط مستقبلية قبل النوم .
10- إخـــتــار مــخــدة مــريــحــة وإغــطــس فـــيــهـا ............ وطبعاً تنام على الجنب إل يريحك .
يا ســلااااااااام ........

إيه الإسترخاء والراحة والهدوء دة
بذمتك فيه أحلى من كدة ؟؟؟
يا سلام لو تبقى أيام الإسبوع كلها خميس
كانت الحياه بقى ليها طعم تانى خااااالص

وياريت كل إل هيجرب نصيحتى
يبقى يقولى أخبار الخميس معاه إيه ؟؟؟
سلام

المستحيل

إذا كان الحبُ يعجزعن العطاء حين يراك
فماذا افعل أنا فى أحضانك الدافئة ؟

وإذا كان العشقُ يفنى ولا يفنى من قلبى هواك
فكيف يكون حبى لك ناراً هادئة ؟

وإذا كانت أسمى معانى الحب تحتار فى معناك
فكيف أعبر لك عن عشقى بكلمات صائبة ؟

وإذا كانت الأحبة تخجل من ذكراك
فمن أكون أنا فى سمائك الشاسعة ؟

يا من علمت الحب كيف يذوب

يا من سلمت العشق مفاتيح القلوب

يا من حيرت قلبى وعقلى

إرحمنى و عد إلىَ
فإننى أذوب

أنا و المراكبى

بعد طول إنتظار ...... وصل المراكبى إلى القاهرة
ولأول مرة مافيش عنده إجتماعات ولا إرتباطات وكمان مافيش موبايلات
و أول ما وصل .......
المراكبى : ايه الزحمة دى كلها ؟؟؟
أنا : عادى يعنى المدارس إبتدت
المراكبى : و ايه علاقة المدارس بالزحمة !!!

ما كل البلاد عندها المدارس بتبدأ و ما حدش بيحس بيها ؟
أنا : معلش أصل إحنا بنحب نتميز عن أى بلد
المراكبى : وفين العساكر عشان تنظم المرور ؟
أنا : صايـميــــن بقى ما تاخدش فى بالك رمضان كريم
يلا علشان نلحق الفطار
المراكبى : أيوة نأكل أحسن ..... إيييييه أمال فين العيش ؟؟؟؟
أنا : ماهو قدامك يا إبنى !!!
المراكبى : قدامى فين ؟؟ إيه دة !!؟؟
إيه إل جرى للعيش !!!! ماله عامل كدة ؟؟؟
أنـا : مـالـه يا سيدى مــاهــو زى الــفــل أهــو ...................... ، آآآآه قــصــدك يــعــنــى عــشــان صــغــروووه شــويــة ؟
كبر دماغك مش فارق كتيير
المراكبى : يا بنتى مش فارق إزاى ؟ زمان كان كـبـيـيـيـر قوى وأبيض وطرى وطعمة حلو

ومافيهوش مسامير وخشب وخيوط
أنا : يـــــــــاااااة دة إنـــت قـــــديــــــم قـــوى ........................ ، لــو عــاوز الــرغــيــف دة تـلاقــيـه فــى الـمـتــحــف
المراكبى : لا حول ولا قوة إلا بالله
تانى يوم .....
المراكبى : صباح الخير
أنا : صباح النور
المراكبى : إمبارح بالليل حصل حاجة غريبة !!!!
أنا : خيـر حصل ايه ؟؟؟
المراكبى : المسحراتى ما جاش
أنا : إيه ؟؟ قول تانى كدة ؟؟ مسحراتى !!!!
مسحراتى إيه يا إبنى .... ما خلاص
المراكبى : خلاص إيه البلدية قبضت علية ؟؟
أنا : لأ ياعم بس بقاله سنة مغير نشاطة
المراكبى : أكيد بيبيع فول مثلاً

أنا : لأ ربنا فتح عليه و بيسوق (توك توك) دلوقت

المراكبى : حسبي الله ونعم الوكيل
* ** ** ** ** *
ولما العيد جه
المراكبى : كل سنة وإنتى طيبة
أنا : و إنت طيب يا حبيبى
المراكبى : أنا نازل أشترى طراطير وبالونات و زمامير و فرافير
أنا : هتشترى منين ؟؟
المراكبى : كالعادة من الراجل إل على الناصية
أنا : إسكت ..... مش غير نشاطة من سنتين
المراكبى : أستر يااااااا ربى ..... إيه ؟ بيسوق ميكروباص ؟؟؟؟
أنا : لأ ... مش للدرجة دى ..... هوة بس بيبيع كروت شحن موبايلات
المراكبى : اللهم إنى لا أسألك رد القضاء ولكنى أسألك اللطف فية
أنا : قلبك أبيض ماتعملش فى نفسك كدة الموضوع مش مستاهل
المراكبى : مش مستاهل إزاى ؟؟؟
وياترى البرج لسة موجود ؟ و الأوبرا والهرم أخبارهم ايه؟
أنا : إطمئن لسة قاعدين مكانهم
بس يعنى إتغير فيهم شوية تفاصيل
المراكبى : كل حاجة إتغيرت أمال فاضل لينا ايه ؟؟؟
أنا : إل فاضل إننا لسة إخوات
ولسة عندنا أهل بيحبونا ويخافوا علينا
وعشان كدة بنرجع بلدنا

وعلى رأى قيس إبن المُلّوَح
( بلادى و إن كانت رمالاً عزيزة ، وليلى وإن كانت خيالاً حبيبة )

مش كدة وله إييييه ؟؟؟؟

هنفطر فييين النهاردة ؟؟؟؟

النهاردة انا راجعة من الشغل تعبانة وهلكانة والدنيا حر مووووت
من الآخر كدة مش قادرة أعمل أكل عشان الفطار
أعمل ايه ؟ أعمل أيه ؟ اعمل ايييييييه ؟
ايوة هوه ده الحل التمام
أروح أكبس على ماما و بابا و أنزل عليهم زى البراشوت و أفطر عندهم
إتصال تيليفونى : ترن ترن ، ترن ترن ، ترن ترن
ماما : ألو
أنا : أيوه يا ماما إزيك ..... أخبارك ايه ؟ وحشتينى
ماما : و انتى كمان
أنا : بأقولك ايه يا ماما مدام وحشتك بقى أنا جاية أفطر معاكى النهاردة
ماما : ياريت كان ينفع والله يابنتى بس إحنا معزومين النهارد برة تبع الشغل ونازلين دلوقت ،...... خليها بكرة أحسن سلام .
أنا : سلام .
بكرة ؟ هأفضل صايمة لحد بكرة ؟؟؟؟
أعمل ايه ؟؟؟ اعمل أيه ؟؟؟؟
أيوه .......... أختى حبيبتى
إتصال تيليفونى(2) : ترن ترن ، ترن ترن ، ترن ترن
أختى : ألو
أنا : أيوة ازيك يا أختى
أختى : أهلاً أهلاً عاملة ايه ؟
أنا : كله تمام ، بأقولك ايه
كنت بأفكر آجى أفطر عندك النهاردة أصلك وحشانى قوى
أختى : أخ ... النهاردة ؟ مممممم ماشى تعالى
أنا : ايه مافيش أكل عندكم النهاردة وله اية ؟
أختى : لأ عندى بس أنا هأرجع من الشغل متأخر و عشان كدة هنأكل سمك جاهز من بره وخلاص
أنا : ايه سمك ؟؟!!!! سمك فى رمضان ؟؟؟
حرام عليكى يا شيخة هوة الواحد ناقص عطش !!!!
أختى : خلاص بلاش النهاردة ممكن تيجى بكرة
أنا : بكرة ؟؟ تانى بكرة ؟؟؟ طيب لما أشوف سلام
ييييه وبعدين.... أعمل ايه ؟؟؟ ..... أيوة وجدتها خالتى
إتصال تيليفونى(3) : ترن ترن ، ترن ترن ، ترن ترن
خالتى : ألو السلام عليكم
أنا : وعليكم السلام إزيك يا خالتى
خالتى : مين بيتكلم ؟؟
أنا : أنا بنت أختك يا خالتى نسيتينى وله اية ؟
خالتى : لأ إزاى .... إزيك يابنتى
أنا : كويسة إنتى عامله ايه وحشانى
خالتى : والله أنا مش كويسة
أنا : ليه كدة بس فيه ايه ؟
خالتى : انا تعبانة بقالى يومين عندى أنفلونزا
أنا : ياخبر ألف سلامة عليكى
خالتى : الله يسلمك متشكريين على سؤالك
أنا : العفو يا خالتى إحنا ال متشكرين على البمبة أأأأأ قصدى متأثرين بمرضك قوى سلام بقى
ايه الحظ النحس دة أعمل ايه ؟؟؟؟؟
أيوة أكيد عمتى فاضية النهاردة
إتصال تيليفونى(4) : ترن ترن ، ترن ترن ، ترن ترن
عمتى : سلامو عليكم
أنا : وعليكم السلام إزيك ياعمتى
عمتى : أزيك أخبارك ايه ؟
أنا : عاملة ايه شكلك مشغولة فى تحضير الفطار صح ؟
عمتى : لأ والله يابنتى دة أنا قاعدة فاضية من الصبح
أنا : يااااه أكيد بقى خلصتى الأكل من بدرى ،
طيب مدام انتى فاضية آجى أقعد معاكى نتسلى وبالمرة نفطر سوا
عمتى : كان على عينى والله يا بنت أخويا بسسسسس .......
أنا : بس اية ياعمتى خير ؟؟؟؟
عمتى : أصل المية مقطوعة من الصبح ومش عارفة أعمل حاجة خالص
خليها بكرة أحسن تكون الميه جت
أنا : ماشى ياعمتى مع السلامة
بكرة ؟؟؟ هوة اية مشكلة بكرة معاهم بالظبط ؟؟؟ يكون فية عيد أو موسم بكرة وأنا ما أعرفش ؟
أعمل ايه ؟؟؟؟ اعمل اييبيية ؟؟؟؟
أيوه الحل أكييييد ...... عند حماتى
ألحق أكلمها مش فاضل وقت كتيير على الفطار
إتصال تيليفونى(5) : ترن ترن ، ترن ترن ، ترن ترن
حماتى : ألو .... ألو
أنا : أزيك يا تنط
حماتى : مين بيتكلم ؟
أنا : أنا مرات إبنك
حماتى : أهلاً إزيك يا حبيبتى
أنا : كويسة أيه الهيصة ال عندك دى يا تنط ؟
حماتى : أصل أنا بأبيض الشقة
أنا : حد بيبيض فى رمضان ؟؟!!!!!
حماتى : أصل الصنايعيه كانوا متفقين معانا يخلصوا قبل رمضان و طبعاً ما إلتزموش بالميعاد
أنا : ماشى ربنا يعينك سلام يا حماتى
خلاص كل الناس النهاردة مش فاضية يا إما عندهم ظروف ؟؟؟
اية النحس دة ..... ،
ياخبر فاضل ربع ساعة على الآذان أعمل ايه ؟؟؟
أروح فين ؟
أيوة ... وجدتها ..... و جدتها
مافيش غير حل سحرى واحد ومش ممكن يكون عندة ظروف أو مشكلة .. وأخيراً ......... وبعد تردد
إتنكرت وإتخفيت ولبست نظارة شمس و نزلت أفطر فى مائدة الرحمّن ال على ناصية الشارع و رمضان كريم .

رمـضـان جـه ....؟؟ !!!!

غريبة قوى .... معقول فاتت سنة ؟
فاتت إمتى ؟ وإزاى ؟ وعملنا فيها إية ؟
وياترى حققنا حاجة تستاهل ان نكون ضييعنا فيها سنة بحالها؟
زمان كان اليوم طويل والإسبوع ممل والشهر بيحصل فية إنجاز
لكن دلوقت السنة بتعدى وإحنا مش واخدين بالنا .
رمضان جة .... !!!
فين رمضان ياترى حد حاسس بية زى زمان ؟
فين عمو فؤاد وفطوطة و نيلى وشيريهان
فين حل الفوازير ال كنا بنتخانق علية وبنشترية آخر الشهر من البياعين ونقعد نبعت جوابات كتيير يمكن نكسب ؟ (وطبعاً عمرنا ما كسبنا)
مش مهم المهم إننا كنا بنتحمع على شىء واحد مش على .. (5000) قناة تيليفزيونية
زمان .... كنا نتجمع ونعمل الزينة بإيدينا من الجلاد وشرائط الحلويات ونعلقها بنفسنا (وبعد يوميين تتقطع ) مش مهم المهم كنا بنتشارك فى شىء واحد

كنا بنلعب بالفوانيس على السلم لحد السحور (ونتهزأ ويمكن نتعاقب) برضة مش مهم المهم نحس بطعم رمضان
كانت العيلة بتتجمع على الفطار كل يومين عند أسرة من الأسر (كان بيتهد حيلنا فى غسيل الصحون والتحضيرات) لكن الأكل كان لية طعم تانى خالص
زمان ...... كانت الستات تتجمع آخر(10) أيام من رمضان عشان تعمل الكحك كل يوم عند واحدة عشان يساعدوها (كانت هيصة وبهدلة والكحك بيتحرق) بس بنحس بالبهجة وطعم الكحك ال تعبنا فية
دلوقت يا سادة يا كرام للأسف كل شىء أصبح صناعى و (تيك أواى)
*الكنافة والقطايف والكحك بنشتريهم جاهزيين

*الزينة (لو إفتكرناها أصلاً) برضة بنشتريها من المكتبة جاهزة
*الفوانيس (ده لو جبناها) تلاقيها بتغنى لنانسى واليسا وسعد الصغير وأغرب فانوس شفتة السنه دى فانوس على هيئة توك توك (والله ما بأهزر) وطبعاً أصبح الفانوس مالوش علاقة برمضان وأغانى رمضان ال إتربينا عليها (أهو لعبة بتغنى وتمشى وخلاص)
* حتى مسلسلات رمضان من كترها فقدت معناها وطعمها
*ولو رحت الحسين أوالفيشاوى تحس إنك قاعد فى البيت ومشغل الدش عادى يعنى مافيش جديد ولا فية روح ولامعنى
هوه رمضان جه ؟
يا جماعة بجد رمضان فيين ؟
حد يرد عليا